ഒരു വലിയ ഇടവേളയ്ക്കുശേഷം സ്കൂളുകൾ വീണ്ടും തുറക്കുകയാണ്. സ്കൂൾ തുറക്കുമ്പോൾ ശ്രദ്ധിക്കേണ്ട കാര്യങ്ങൾ എന്തൊക്കെയാണെന്ന് നോക്കാം.
വേണം ചിട്ട
കുഞ്ഞുങ്ങളുടെ ഭക്ഷണം ക്രമമാക്കാൻ ആദ്യം ഒരു ഷെഡ്യൂൾ തയ്യാറാക്കണം. പച്ചക്കറികളും പ്രോട്ടീനും കാർബോഹൈഡ്രേറ്റ്സും കൃത്യമായ അളവിൽ ഉൾപ്പെടുത്തി ഭക്ഷണം അഞ്ച് നേരമായി നൽകണം.
ചപ്പാത്തി അല്ലെങ്കിൽ ചോറ്, ദാൽ, പച്ചക്കറി, തൈര്, പഴങ്ങൾ എന്നിവ ഉൾക്കൊള്ളിക്കാൻ ശ്രദ്ധിക്കണം. വെള്ളം ധാരാളം കൊടുക്കാൻ ശ്രമിക്കുക. നന്നായി ഭക്ഷണം കഴിച്ചാൽ കുഞ്ഞുങ്ങൾക്ക് വാശിയും ദേഷ്യവും കുറവായിരിക്കും.
പ്രഭാത ഭക്ഷണം പ്രധാനം
കുട്ടിക്ക് ഒരു ദിവസം വേണ്ട ഊർജത്തിന്റെയും മറ്റു പോഷകങ്ങളുടെയും മൂന്നിലൊന്ന് പ്രഭാത ഭക്ഷണത്തിൽ നിന്ന് ലഭിക്കണം. പോഷകക്കുറവ് വിളർച്ചയ്ക്കും വളർച്ചക്കുറവിനും കാരണമാകും. മെറ്റബോളിസം കുറയുന്നത് അമിതവണ്ണത്തിനും കൊളസ്ട്രോളിനും ഇടയാക്കുന്നു. പ്രഭാത ഭക്ഷണം കുറഞ്ഞാൽ രക്തത്തിലെ പഞ്ചസാരയുടെ അളവ് താഴുന്നു. ഇങ്ങനെ തലച്ചോറിലേക്കുള്ള ഓക്സിജൻ കുറയാനും ന്യൂറോണുകൾക്ക് അപചയം സംഭവിക്കാനും സാദ്ധ്യതയുണ്ട്. സ്കൂളിൽ പോകുന്ന സമയത്തിന് അനുസരിച്ച് വേണം പ്രഭാത ഭക്ഷണം ക്രമീകരിക്കാൻ. ആവിയിൽ വേവിച്ച ഭക്ഷണങ്ങളാണ് ദഹനത്തിന് നല്ലത്. പാൽ, മുട്ട, പയറുവർഗങ്ങൾ എന്നിവ രക്തത്തിലെ റ്റൈറോസിൻ (അമിനോ ആസിഡ്) അളവിനെ വർദ്ധിപ്പിച്ച് കുട്ടികളുടെ തലേച്ചാറിന്റെ പ്രവർത്തനം ത്വരിതപ്പെടുത്തുന്നു.
ലഘുഭക്ഷണം
കുട്ടികൾക്ക് ആരോഗ്യദായകമായ സ്നാക്സ് സ്കൂളിൽ കൊടുത്ത് വിടാം. പഴവർഗങ്ങൾ, അണ്ടിപ്പരിപ്പുകൾ, ആവിയിൽ പുഴുങ്ങിയ ചെറുപലഹാരം, അവൽ വിളയിച്ചത് തുടങ്ങിയവ നൽകാം.
ഉച്ചഭക്ഷണം
ലഞ്ച് ബോക്സിൽ ചോറ് നിർബന്ധമില്ല. പകരം സ്റ്റഫ്ഡ് ചപ്പാത്തിയോ സാൻഡ്വിച്ചോ കൊടുത്തുവിടാം. പലതരത്തിലുള്ള റൈസ് വിഭവങ്ങളും നൽകാം. പുലാവ്, ഫ്രൈഡ് റൈസ്, തൈര് ചോറ്, നാരങ്ങാ ചോറ് എന്നിവയും ഇലക്കറികളും ഉൾപ്പെടുത്തിയാൽ സൂക്ഷ്മപോഷകങ്ങളുടെ കുറവ് നികത്താം. പഴങ്ങളിലും പച്ചക്കറികളിലുമുള്ള ഫൈറ്റോ ന്യൂട്രിയൻസുകൾ രോഗപ്രതിരോധശക്തി വർദ്ധിപ്പിക്കും. ചീര, പിങ്ക് കാബേജ്, കാരറ്റ്, ബീറ്റ്റൂട്ട്, മഞ്ഞനിറത്തിലുള്ള പഴങ്ങൾ (മാങ്ങ, പപ്പായ, പൈനാപ്പിൾ) ഇവയിലുള്ള കരോട്ടിനും വിറ്റമിൻ എ യും കുട്ടികളുടെ കാഴ്ച ശക്തിയെ സംരക്ഷിക്കുന്നു.
നാലുമണി ആഹാരം
സ്കൂൾവിട്ട് വരുന്ന കുട്ടിക്ക് കൊഴുപ്പടങ്ങിയ ആഹാരത്തിന് പകരം വീട്ടിൽ തയാറാക്കുന്ന ആരോഗ്യകരമായ ലഘുഭക്ഷണം നൽക്കാൻ ശ്രദ്ധിക്കണം. അവൽ, ഏത്തപ്പഴം, ഇലയട, പുഴുങ്ങിയ പയർവർഗങ്ങൾ, മിൽക്ക് ഷെയ്ക്കുകൾ, സൂപ്പുകൾ, ഫ്രൂട്ട് ജൂസുകൾ ഇവയെല്ലാം കുട്ടികളുടെ ക്ഷീണമകറ്റി ഉത്സാഹവും പ്രസരിപ്പും നൽക്കാൻ സഹായിക്കും.
അത്താഴം അളവ് ശ്രദ്ധിക്കണം
പ്രാതൽ പോലെ പ്രധാന്യം അർഹിക്കുന്നതാണ് കുട്ടികളുടെ അത്താഴവും. കൊഴുപ്പ് കുറഞ്ഞതും നാരുകൾ ധാരാളം അടങ്ങിയതുമായിരിക്കണം രാത്രി ഭക്ഷണം. അമിതമായ മധുരം, പുളി, എരിവ് എന്നിവ അത്താഴത്തിൽ ഒഴിവാക്കാം. ആഹാരം കഴിച്ച് ഒരു മണിക്കൂർ കഴിഞ്ഞേ ഉറങ്ങാൻ കിടക്കാവൂ.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |