തിടുക്കം വേണ്ട, മാസ്ക് മാറ്റാൻ സമയമായില്ല

തിരുവനന്തപുരം : കൊവിഡ് വ്യാപനത്തെത്തുടർന്ന് ഉപയോഗിച്ച് തുടങ്ങിയ മാസ്ക് മാറ്റാൻ സമയമായിട്ടില്ലെന്നും അതിന് കേന്ദ്രനിർദ്ദേശം വേണമെന്നും ചീഫ് സെക്രട്ടറി വി.പി.ജോയ് പറഞ്ഞു. കൊവിഡ് വ്യാപനം കുറഞ്ഞതിന് അനുസരിച്ചുള്ള ഇളവ് നിലവിലുണ്ടെന്നും അദ്ദേഹം പറഞ്ഞു. മാസ്‌ക് മാറ്റാൻ തിടുക്കം വേണ്ടെന്ന് കൊവിഡ് സംസ്ഥാന വിദഗ്ദ്ധസമിതി അദ്ധ്യക്ഷൻ ഡോ.ബി.ഇക്ബാലും പ്രതികരിച്ചു. രണ്ട് ദിവസം മുമ്പ് ആയിരത്തിൽ താഴെയായ പ്രതിദിന കൊവിഡ് രോഗികൾ ഇന്നലെ വീണ്ടും ആയിരം കടന്നു. കൊവിഡ് പഠിപ്പിച്ച നല്ല ശീലങ്ങളിലൊന്നാണ് മാസ്‌ക് ധാരണം. മാസ‌്ക് ധരിക്കുന്നതിനാൽ മറ്റ് ആരോഗ്യ പ്രശ്നങ്ങളുണ്ടാകില്ല. പലരോഗങ്ങളിൽ നിന്നും സംരക്ഷണവും ലഭിക്കും. അതിനാൽ ഇത് വേഗത്തിലെടുക്കേണ്ട തീരുമാനമല്ലെന്നും അദ്ദേഹം പറഞ്ഞു.