ജീവിതത്തിലെ ഏറ്റവും സന്തോഷകരമായ വാർത്ത കഴിഞ്ഞ മാസമാണ് പോപ് ഗായിക ബ്രിട്ട്‌നി സ്പിയേഴ്സ്‌ ആരാധകരുമായി പങ്കുവച്ചത്. ഒരു മാസത്തിനിപ്പുറം ആ സന്തോഷം വേദനയായി മാറിയിരിക്കുകയാണ്.

തങ്ങൾക്കൊരു കുഞ്ഞ് പിറക്കാൻ പോകുന്നുവെന്നാണ് ബ്രിട്ട്നി സ്പിയേഴ്സും പങ്കാളി സാം അസ്‌ഖാരിയും അറിയിച്ചത്. ഇപ്പോൾ ആ കുഞ്ഞിനെ നഷ്ടമായിരിക്കുന്നുവെന്ന വാർത്തയും ഇരുവരും ചേർന്ന് സോഷ്യൽ മീഡിയയിൽ പോസ്റ്റ് ചെയ്തിരിക്കുകയാണ്.

ഏതൊരു രക്ഷിതാവിനെയും തകർത്തു കളയുന്ന സമയമാണിത്. അമ്മയാകാൻ പോകുന്ന സന്തോഷവാർത്ത അല്പം കൂടി കാത്തിരുന്നതിന് ശേഷം പ്രഖ്യാപിക്കേണ്ടതായിരുന്നു. അമിതമായ സന്തോഷം കൊണ്ടാണ് അന്ന് എല്ലാവരെയും അക്കാര്യം അറിയിച്ചത്. പ്രയാസമേറിയ ഈ സമയത്ത് ഞങ്ങൾക്ക് സ്വകാര്യത നൽകണമെന്ന് അഭ്യർത്ഥിക്കുന്നു. മനോഹരമായ കുടുംബം വിപുലീകരിക്കാനുള്ള ശ്രമം ഇനിയും തുടരുമെന്നും അവർ കുറിച്ചു.

View this post on Instagram

A post shared by Britney Spears (@britneyspears)

പിതാവ് ജാമി സ്പിയേഴ്സിൽ നിന്നും കഴിഞ്ഞ ഒക്‌ടോബറിലാണ് ബ്രിട്ട്നി സ്പിയേഴ്സ് മോചനം നേടിയത്. ബ്രിട്ട്ണിയുടെ സ്വകാര്യജീവിതവും സാമ്പത്തിക കാര്യങ്ങളുമെല്ലാം നിയന്ത്രിച്ചിരുന്നത് ജാമിയായിരുന്നു. കൂടാതെ,​ താരത്തെ ഗർഭം ധരിക്കുന്നതിൽ നിന്നും വിലക്കേർപ്പെടുത്തിയിരുന്നു.

ഇതിന് വേണ്ടി പതിവായി മരുന്നുകൾ കഴിപ്പിച്ചിരുന്നു. പിതാവിന്റെ പീഡനം സഹിക്കാതെ വന്നതോടെയാണ് അവർ കോടതിയെ സമീപിച്ചത്. രക്ഷാകർത്വത്തിൽ നിന്നും സ്വതന്ത്രയാക്കപ്പെട്ടതിന് പിന്നാലെ വിവാഹിതയാവുകയാണെന്ന് ഗായിക അറിയിച്ചിരുന്നു. ആരാധകർ ഏറെ സന്തോഷത്തോടെയാണ് ഈ വാർത്ത കേട്ടത്.