ഐഎഎസ് തലപ്പത്ത് മാറ്റം; ശ്രീറാം വെങ്കിട്ടരാമൻ ആലപ്പുഴ കളക്ടർ,​ ജെറോമിക് ജോർജ് തിരുവനന്തപുരം കളക്ടറാകും,​ രേണുരാജ് എറണാകുളത്തേക്ക്

തിരുവനന്തപുരം: സംസ്ഥാനത്ത് ഐ.എ.എസ് തലപ്പത്ത് അഴിച്ചുപണി. ശ്രീറാം വെങ്കിട്ടരാമനെ ആലപ്പുഴ ജില്ലാകളക്ടറായി നിയമിച്ചു. ആലപ്പുഴ കളക്ടറായിരുന്ന രേണു രാജിനെ എറണാകുളത്തേക്ക് മാറ്റി. തിരുവനന്തപുരം കളക്ടർ ഡോ. നവ്‌ജ്യോത് ഖോസ ആരോഗ്യവകുപ്പിൽ ജോയിന്റ് ഡയറക്ടറാകും. മെഡിക്കൽ സർവീസസ് കോർപ്പറേഷൻ എം.ഡിയുടെ ചുമതലയും നവ്ജ്യോത് ഖോസെക്കാണ്. ജെറോമിക് ജോർജ് ആണ് തിരുവനന്തപുരത്തെ പുതിയ കളക്ടർ. നിലവിൽ ലാൻഡ് റവന്യു വിഭാഗം ജോയിന്റ് കമ്മിഷണറായിരുന്നു.

ഉദ്യോഗസ്ഥ തലത്തിലും മാറ്റമുണ്ട്. കെ.എസ്.ഐ.ഡി.സി മാനേജിംഗ് ഡയറക്ടർ രാജമാണിക്യത്തെ റൂറൽ ഡെവലപ്‌മെന്റ് കമ്മിഷണറാക്കി. ജാഫർ മാലിക് പി.ആർ.ഡി ഡയറക്ടറാകും. മൈനിംഗ് ആൻഡ് ജിയോളജി വകുപ്പിന്റെ അധിക ചുമതലയും ജാഫർ മാലികിനുണ്ട്. കെ.എസ്‌.ഐ.ഡി.സി മാനേജിംഗ് ഡയറക്ടറായി ഹരികിഷോറിനെ നിയമിക്കാനും സർക്കാർ തീരുമാനിച്ചു. നിലവിലെ വ്യവസായ വാണിജ്യ വകുപ്പ് ഡയറക്ടർ ചുമതലയ്ക്കൊപ്പം കെ.എസ്.ഐ.ഡി.സി എം.ഡിയുടെ അധിക ചുമതലയാണ് ഹരികിഷോറിന് നൽകിയത്.