കരുമലയിൽ പ്രകൃതി വാതകപൈപ്പ് ചോർച്ച

ബാലുശ്ശേരി (കോഴിക്കോട്): കരുമലയിൽ റോഡ് പണിക്കിടെ പ്രകൃതി വാതക പൈപ്പ് പൊട്ടിയത് ജനങ്ങളിൽ പരിഭ്രാന്തി സൃഷ്ടിച്ചു. ഇന്നലെ രാവിലെ 9.10 ഓടെ കരുമല സർവീസ് സ്റ്റേഷനു സമീപം വീടുകളിലേക്കുള്ള പൈപ്പിലാണ് ചോർച്ചയുണ്ടായത്. ഗന്ധം പരന്നതോടെ ജനങ്ങൾ നരിക്കുനിയിലെ അഗ്നിശമനസേനയെയും ഇന്ത്യൻ ഓയിൽ-അദാനി ഗ്യാസ് ഉദ്യോഗസ്ഥരെയും അറിയിച്ചു. അവരെത്തി പരിശോധന നടത്തി 20 മിനിട്ടിനകം പൈപ്പ് മാറ്റി പ്രശ്നം പരിഹരിച്ചു.

സംസ്ഥാന പാത നവീകരണം നടത്തിയപ്പോൾ പുറത്തേക്ക് വവന്ന ഗ്യാസ് പൈപ്പ് ചൂട് ടാറും മെറ്റലും വീണ് ഉരുകിപ്പോവുകയായിരുന്നു. ഗ്യാസ് പൈപ്പ് ലൈൻ കടന്നുപോകുന്ന സ്ഥലത്ത് പ്രവൃത്തി നടക്കുമ്പോൾ അധികൃതരെ അറിയിക്കുക പതിവായിരുന്നു. കഴിഞ്ഞ ദിവസം അതുണ്ടായില്ല.