ലണ്ടൻ : ഇത് സ്മാർട്ട് വാച്ചുകളുടെ യുഗമാണെന്ന് നമുക്കറിയാം. പക്ഷേ, ലോകത്തിലെ ഏറ്റവും വിലകൂടിയ വാച്ച് ഏതാണെന്ന് ചോദിച്ചാൽ എന്തായിരിക്കും ഉത്തരം ?​ ഏതെങ്കിലും സ്മാർട്ട് വാച്ച് ബ്രാൻഡ് ആയിരിക്കുമെന്ന് കരുതിയെങ്കിൽ തെറ്റി. ലോകത്തെ ഏറ്റവും വില കൂടിയ വാച്ചെന്ന റെക്കോഡ് ' ഗ്രാഫ് ഡയമണ്ട്സ് ഹാലുസിനേഷനാ"ണ്. 110 കാരറ്റിലെ അപൂർവ ഡയമണ്ടുകളാൽ തീർത്തതാണ് ഈ വാച്ച്. 55 മില്യൺ ഡോളർ അഥവാ ഏകദേശം 450 കോടി രൂപയാണ് 2014ൽ നിർമ്മിച്ച ഈ രാജകീയ വാച്ചിന്റെ വില.

എന്നാൽ ഈ വാച്ച് വില്പനയ്ക്ക് ലഭ്യമല്ല എന്നതാണ് വസ്തുത. ലോകത്തിലെ ഏറ്റവും വില കൂടിയ വാച്ച് തങ്ങൾക്കാണെന്ന നേട്ടം സ്വന്തമാക്കാനാണ് ബ്രിട്ടണിലെ ആഭരണ ബ്രാൻഡായ ഗ്രാഫ് കമ്പനി ഈ വാച്ച് നിർമ്മിച്ചത്.

പ്ലാറ്റിനത്തിൽ കാലിഡോസ്കോപ്പിക് ശ്രേണിയിൽ പല നിറത്തിലെയും വിവിധ കട്ടിലെയും ഡയമണ്ടുകൾ പതിപ്പിച്ച ഈ വാച്ച് ആയിരം മണിക്കൂറെടുത്താണ് നിർമ്മിച്ചതെന്ന് കമ്പനി അവകാശപ്പെടുന്നു. ഗ്രാഫ് കമ്പനിയുടെ തന്നെ ' ദ ഫാസിനേഷൻ " വാച്ചാണ് വിലയുടെ കാര്യത്തിൽ രണ്ടാം സ്ഥാനത്ത്. 152.96 കാരറ്റ് വൈറ്റ് ഡയമണ്ടുകളും നടുവിൽ 38 കാരറ്റിലെ പിയർ ആകൃതിയിലെ ഡയമണ്ടും പതിപ്പിച്ച ഈ വാച്ചിന്റെ വില 40 മില്യൺ ഡോളറാണ്.

അതേ സമയം, ഏറ്റവും ഉയർന്ന വിലയ്ക്ക് വിറ്റ വാച്ച് 2019ൽ ജനീവയിൽ വച്ച് ലേലത്തിൽ പോയ പാറ്റെക് ഫിലിപ്പ് ഗ്രാൻഡ്മാസ്റ്റർ ചൈം 6300എ - 010 ആണ്. 31.19 മില്യൺ ഡോളറിനാണ് ഇത് വിറ്റത്.