തിരുവനന്തപുരത്ത് വന്ന് കെളയ്ക്കാൻ നിക്കല്ലേ,​ കൊട്ട മധുവും സംഘവും വരുന്നു,​ കാപ്പ ട്രെയിലർ പുറത്ത്

'കെട്ടിട്ടു വച്ചിരിക്കുന്ന പഴയ ഒരു കണക്കുപുസ്തകം ഉണ്ട് എനിക്ക്. അതിനി തുറക്കണതാരാണെങ്കിലും അടയ്ക്കണത് മധു തന്നെയായിരിക്കും,​." തലസ്ഥാനത്തെ ഗുണ്ടാപ്പകയുടെ കഥയുമായി കൊട്ട മധുവും സംഘവും വരുന്നു. കടുവയ്ക്ക് ശേഷം പൃഥ്വിരാജിനെ നായകനാക്കി ഷാജി കൈലാസ് സംവിധാനം ചെയ്യുന്ന ചിത്രമായ കാപ്പയുടെ ട്രെയിലർ പുറത്തിറങ്ങി. പൃഥ്വിരാജിനൊപ്പം ആസിഫ് അലിയും പ്രധാന കഥാപാത്രത്തെ അവതരിപ്പിക്കും.

ക്രിസ്മസ് റിലീസ് ആയി ഡിസംബർ 22നാണ് സരിഗമയും തീയറ്റർ ഓഫ് ഡ്രീംസും ഈ ചിത്രം തിയറ്ററുകളിൽ എത്തിക്കുന്നത്. അപർണ ബാലമുരളിയാണ് ചിത്രത്തിൽ നായിക വേഷത്തിൽ എത്തുന്നത്. ജിനു വി ഏബ്രഹാം, ഡോൾവിൻ കുര്യാക്കോസ് ദിലീഷ് നായർ എന്നിവരുടെ പങ്കാളിത്തത്തിൽ ആരംഭിച്ച തിയേറ്റർ ഓഫ് ഡ്രീംസ് , സരിഗമ ഇന്ത്യ പ്രൈവറ്റ് ലിമിറ്റഡ്,
ഫെഫ്ക റൈറ്റേഴ്സ് യൂണിയന്റെ സഹകരണത്തിൽ നിർമ്മിക്കുന്ന ചിത്രമാണ് കാപ്പ.

ഇന്ദുഗോപന്റെ പ്രശസ്ത നോവലായ ശംഖുമുഖിയെ അടിസ്ഥാനപ്പെടുത്തിയാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ഇന്ദുഗോപൻ തന്നെയാണ് ചിത്രത്തിന്റെ ചനയും നിർവഹിക്കുന്നത്. തിരുവനന്തപുരത്തെ ലോക്കൽ ഗുണ്ടകളുടെ പശ്ചാത്തലത്തിലാണ് കാപ്പയുടെ കഥ പറയുന്നത്. ചിത്രത്തിലെ പൃഥ്വിരാജിന്റെ ലുക്കും കൊട്ടമധു എന്ന കഥാപാത്രവും ഇതിനോടകം തന്നെ സോഷ്യൽ മീഡിയയിൽ ശ്രദ്ധ നേടിയിരുന്നു. അന്ന ബെൻ,​ ദിലീഷ് പോത്തൻ, ജഗദീഷ്, നന്ദു എന്നിവരും ചിത്രത്തിന്റെ താരനിരയിൽ ഉണ്ട്. ഛായാഗ്രഹണം- ജോമോൻ ടി ജോൺ. എഡിറ്റർ-ഷമീർ മുഹമ്മദ് ,​ പ്രൊഡക്ഷൻ കൺട്രോളർ- സഞ്ചു ജെ,​ അസോസിയേറ്റ് ഡയറക്ടർ- മനു സുധാകരൻ,​ കലാസംവിധാനം- ദിലീപ് നാഥ്,​ വസ്ത്രാലങ്കാരം- സമീറ സനീഷ്,​ മേക്കപ്പ്- സജി കാട്ടാക്കട,​ സ്റ്റിൽസ്-ഹരി തിരുമല,​ പിആർഓ - ശബരി.