പുകയിൽ വിറങ്ങലിച്ച് മെഡിക്കൽ കോളേജ്

കോട്ടയം: ഏഴുനിലക്കെട്ടിത്തെ തീ വീഴുങ്ങിത്തുടങ്ങിയപ്പോൾ തന്നെ മെഡിക്കൽ കോളേജ് ആശുപത്രി പരിസരം യുദ്ധസമാനമായ അന്തരീക്ഷത്തിന് വഴിമാറിയിരുന്നു. ആളുന്ന തീയിൽ സർവതും കറുത്ത പുകയിലമർന്നു. ഞൊടിയിടയിൽ 10 യൂണിറ്റ് ഫയർഫോഴ്സാണ് ആശുപത്രി പരിസരത്തേക്ക് പാഞ്ഞടുത്തത്.

എ.സി ഘടിപ്പിക്കുന്നതി​ന്റെ ഭാ​ഗമായി കെട്ടിടത്തിൽ ഇലക്ട്രിക്കൽ, വെൽഡിംഗ് ജോലികൾ പുരോ​ഗമിക്കുകയായിരുന്നു. ഇവിടെ നിന്ന് തീ പടർന്നുവെന്നാണ് പ്രാഥമിക വിവരം. സ്‌പോഞ്ച്, വയറുകൾ, പശ തുടങ്ങിയവയ്ക്ക് തീ പിടിച്ചതോടെ കനത്ത പുകയും ഉയർന്നു. നാലു നിലകളിലേക്ക് തീപടർന്നു. കെട്ടിടത്തിൽ 360 ജോലിക്കാരാണുണ്ടായിരുന്നത്. തീപിടിച്ച ഒന്നാം നിലയിൽ മാത്രം 25 പേർ ഉണ്ടായിരുന്നു.

കോട്ടയം ഫയർ ​സ്റ്റേഷനിൽ 12.53നാണ് വിവരമെത്തുന്നത്. കോട്ടയത്തുനിന്ന് മൂന്ന് യൂണിറ്റ്, ചങ്ങനാശേരി -1, പാലാ-1, പാമ്പാടി-1, കടുത്തുരുത്തി -2, വൈക്കം -2 എന്നിങ്ങനെ അ​ഗ്നിരക്ഷാ യൂണിറ്റുകൾ ഓടിയെത്തി. ഒരു മണിക്കൂറത്തെ കഠിന പ്രയത്നത്തിനൊടുവിലാണ് തീയും പുകയും ശമിച്ചത്.

ഒന്നാം നിലയിലെ തീയാണ് ആദ്യം അണച്ചത്. കനത്ത പുക വെല്ലുവിളിയായെങ്കിലും ഉദ്യോ​ഗസ്ഥരുടെ മനകരുത്തിൽ എല്ലാം കെട്ടടങ്ങി. തിരുവഞ്ചൂർ രാധാകൃഷ്ണൻ എം.എൽ.എ, ജില്ലാ പഞ്ചായത്ത് പ്രസിഡ​ന്റ് കെ.വി. ബിന്ദു, ജില്ലാ പഞ്ചായത്തം​ഗം റോസമ്മ സോണി, കോട്ടയം തഹസിൽദാർ അനിൽകുമാർ തുടങ്ങിയവർ സ്ഥലത്തെത്തി. സംഭവത്തെതുടർന്ന് നിർമ്മാണം താത്കാലികമായി നിറുത്തി വെച്ചതായി മെഡിക്കൽ കോളേജ് വൈസ് പ്രിൻസിപ്പൽ ഡോ. വർ​ഗീസ് പി. പുന്നൂസ് പറഞ്ഞു.

 തീപിടിത്തം തുടർക്കഥ
മെഡിക്കൽ കോളേജിൽ തീപിടിത്തം തുടർക്കഥയാകുമ്പോഴും ഫയർ ​സ്റ്റേഷൻ സജ്ജമാക്കാൻ അധികാരികൾക്ക് സാധിച്ചിട്ടില്ല. ഏറ്റുമാനൂരിലും ഫയർ‍ ​സ്റ്റേഷനില്ലാത്തത് വലിയ വെല്ലുവിളിയാണ്. അപകടമുണ്ടായാൽ കോട്ടയത്തു നിന്ന് വേണം അ​ഗ്നിരക്ഷാ യൂണിറ്റുകളെത്താൻ. ജനുവരി അവസാനം ​ഗൈനക്കോളജി വിഭാ​ഗത്തിലെ ലക്ചർ ഹാളിലും തീപിടിച്ചിരുന്നു. സുരക്ഷാ ഉദ്യോ​ഗസ്ഥരുടെയും ലിഫ്റ്റ് ഓപ്പറേറ്ററുടെയും അവസരോചിതമായ ഇടപെടലാണ് അന്ന് രക്ഷിച്ചത്. ദിവസേന ആയിരക്കണക്കിന് രോ​ഗികളെത്തുന്ന മെഡിക്കൽ കോളേജിൽ അടിയന്തര സാഹചര്യം കൈകാര്യം ചെയ്യാനായി ഫയർ യൂണിറ്റ് വേണമെന്ന ആവശ്യം ശക്തമാകുകയാണ്.