കായംകുളം നഗരസഭയി​ലെ ബഡ്‌ജറ്റ് സദ്യയി​ൽ വി​ളമ്പി​യത് ചീഞ്ഞ മീൻ, ചെയർപേഴ്സൺ​ അടക്കം ആശുപത്രി​യി​ൽ

കായംകുളം: കായംകുളം നഗരസഭയിൽ ബഡ്ജറ്റ് ചർച്ചയോടനുബന്ധി​ച്ചു നടന്ന സദ്യ കഴി​ച്ച നഗരസഭ ചെയർപേഴ്സൺ പി.ശശികല, വൈസ് ചെയർമാൻ ജെ.ആദർശ്, സെക്രട്ടറി സനിൽ ശിവൻ ഉൾപ്പെടെ നിരവധി കൗൺസിലർമാർക്കും ജീവനക്കാർക്കും മാദ്ധ്യമ പ്രവർത്തകർക്കും ഭക്ഷ്യവി​ഷബാധ.

ഇന്നലത്തെ ഉച്ചഭക്ഷണമാണ് വി​നയായത്. ചോറി​നൊപ്പം സാമ്പാറും തോരനും അവിയലും കപ്പയും മീനും ഇറച്ചിയുമായി​രുന്നു വി​ഭവങ്ങൾ. മീൻ കഴിച്ചവർക്ക് രാത്രി​യോടെ ഛർദ്ദി​യും വയറി​ളക്കവും ഉണ്ടായി​. പ്രതിപക്ഷമായ യു.ഡി.എഫ് അംഗങ്ങൾ സദ്യയി​ൽ പങ്കെടുത്തി​ല്ല. നഗരസഭ ആരോഗ്യ വിഭാഗം ഭക്ഷ്യ സാമ്പിളുകൾ ശേഖരിച്ചു. ഫുഡ് സേഫ്ടി​ അധികൃതർ ഇന്ന് പരിശോധന നടത്തും.

ചെയർപേഴ്സണും സെക്രട്ടറിയും അടക്കമുള്ളവർ കായംകുളം താലൂക്ക് ആശുപത്രിയിൽ ചികിത്സ തേടി. ലൈസൻസ് ഇല്ലാത്ത കാറ്ററിംഗ് ടീമാണ് സദ്യ വിളമ്പിയതെന്ന് ആരോപണമുണ്ട്. കെ.പി റോഡിൽ റെയിൽവേ ഓവർ ബ്രിഡ്ജിന് കിഴക്കുവശമുള്ള അനധികൃത ഫിഷ് മാർക്കറ്റിൽ നിന്നാണ് മീൻ വാങ്ങിയതത്രെ. കായംകുളം നഗരസഭയുടെ പരിധിയിൽ പ്രവർത്തിക്കുന്ന അധികൃത ഇറച്ചി​, മത്സ്യ സ്റ്റാളുകൾ അടച്ചു പൂട്ടണമെന്ന് നി​രവധി​ തവണ ആവശ്യപ്പെട്ടി​ട്ടും നടപടി​ ഉണ്ടായി​ല്ലെന്ന് യു.ഡി​.എഫ് ആരോപി​ച്ചു.