ശബരിമല നട 14ന് തുറക്കും

പത്തനംതിട്ട: ഇടവമാസ പൂജകൾക്കായി ശബരിമലനട 14ന് തുറക്കും. വൈകിട്ട് 5ന് തന്ത്രി കണ്ഠരര് മഹേഷ് മോഹനരുടെ മുഖ്യകാർമ്മികത്വത്തിൽ മേൽശാന്തി വി.ജയരാമൻ നമ്പൂതിരി ശ്രീകോവിൽ തുറന്ന് ദീപം തെളിക്കും. അന്ന് പ്രത്യേക പൂജകളില്ല. ഇടവം ഒന്നായ 15ന് പുലർച്ചെ 5ന് നിർമ്മാല്യ ദർശനവും പതിവ് അഭിഷേകവും തന്ത്രിയുടെ കാർമ്മികത്വത്തിൽ ഗണപതി ഹോമവും നടക്കും. വെർച്വൽ ക്യൂ ബുക്ക് ചെയ്തും സ്‌പോട്ട് ബുക്കിംഗിലൂടെയും ദർശനം നടത്താം. 19ന് രാത്രി 10ന് നട അടയ്ക്കും. പ്രതിഷ്ഠാദിന പൂജകൾക്കായി 29ന് വൈകിട്ട് തുറക്കും. 30നാണ് പ്രതിഷ്ഠാദിനം.