നടപ്പു സാമ്പത്തിക വർഷത്തിലെ രണ്ടാം മാസത്തിലെ വാഹന വില്പന കണക്കുകൾ പുറത്തുവന്നുകൊണ്ടിരിക്കുന്നു. 14.91 ശതമാനം വില്പന വളർച്ചയാണ് ദക്ഷിണ കൊറിയൻ വാഹന ബ്രാൻഡായ ഹ്യുണ്ടായ് മോട്ടോർ ഇന്ത്യയ്ക്കുള്ളത്. കഴിഞ്ഞ വർഷം ഇതേ മാസത്തെ 42,293 യൂണിറ്റുകളിൽ നിന്ന് ആഭ്യന്തര വിപണിയിൽ 42,293 യൂണിറ്റുകൾ റീട്ടെയിൽ വില്പന നടത്താൻ കമ്പനിക്ക് കഴിഞ്ഞു.

എങ്കിലും 2023 ഏപ്രിലിനെ അപേക്ഷിച്ച് പ്രതിമാസ വിൽപ്പനയിൽ നേരിയ ഇടിവുണ്ടായി. കഴിഞ്ഞ മാസം കമ്പനി മൊത്തം 11,000 യൂണിറ്റുകൾ കയറ്റുമതി ചെയ്തു. ഏറ്റവും കൂടുതൽ വിറ്റഴിക്കപ്പെടുന്ന ക്രെറ്റ, വെന്യു, ഗ്രാൻഡ് i10 നിയോസ് എന്നിവയ്‌ക്കൊപ്പം പുതുതലമുറ വെർണയും 59,601 യൂണിറ്റുകളുടെ സഞ്ചിത വിൽപ്പന നേടാൻ കമ്പനിയെ സഹായിച്ചു.

ഈ വ‌ർഷം ജൂലായ് 10ന് എക്‌സ്‌റ്റർ മൈക്രോ എസ്‌യുവി അവതരിപ്പിക്കാൻ ഹ്യുണ്ടായ് ഒരുങ്ങുകയാണ്. അതിനാൽ വരും മാസങ്ങളിൽ ഈ കണക്കുകൾ ഇനിയും ഉയരുമെന്ന് പ്രതീക്ഷിക്കുന്നു . എക്സ്റ്ററിന് അഞ്ച് ട്രിം ഓപ്‌ഷനുകൾ ഉണ്ടായിരിക്കും - EX, S, SX, SX (O), SX (O) കണക്റ്റ് എന്നിവ.

എക്‌സ്‌റ്ററിന് ശേഷം, ഹ്യുണ്ടായിയുടെ അടുത്ത പ്രധാന ഉൽപ്പന്ന ലോഞ്ച് ആയിരിക്കും ക്രെറ്റ ഫെയ്‌സ്‌ലിഫ്റ്റ്. എസ്‌യുവിക്ക് അകത്തും പുറത്തും കാര്യമായ അപ്‌ഡേറ്റുകൾ ലഭിക്കും. 1.5 ലിറ്റർ ഡീസൽ, 1.5 ലിറ്റർ പെട്രോൾ, 1.5 ലിറ്റർ ടർബോ പെട്രോൾ എന്നിവ ഇതിന്റെ എഞ്ചിൻ സജ്ജീകരണത്തിൽ ഉണ്ടാകും. 2024 ന്റെ ആദ്യ പാദത്തിൽ ക്രെറ്റ എൻ ലൈനും കമ്പനി അവതരിപ്പിക്കുമെന്ന് റിപ്പോർട്ടുകൾ സൂചിപ്പിക്കുന്നു. ഈ മോഡൽ 160 ബിഎച്ച്പി, 1.5 എൽ ടർബോ പെട്രോൾ എഞ്ചിനുമായി വരാൻ സാധ്യതയുണ്ടെന്നാണ് റിപ്പോർട്ടുകൾ.