തിരുവനന്തപുരം : സാമൂഹ്യസുരക്ഷ,​ ക്ഷേമനിധി പെൻഷൻ രണ്ട് ഗഡു കൂടി വിഷുവിന് മുൻപ് വിതരണം ചെയ്യുമെന്ന് മന്ത്രി കെ.എൻ. ബാലഗോപാൽ അറിയിച്ചു. 3200 രൂപ വീതമാണ് ലഭിക്കുക. നിലവിൽ ഒരു ഗഡു പെൻഷൻ വിതരണം ചെയ്തു തുടങ്ങി. ഇതോടെ വിഷു,​ ഈസ്റ്റർ,​ റംസാൻ കാലത്ത് 4800 രൂപ വീതം ഗുണഭോക്താക്കൾക്ക് ലഭിക്കും.

ക്ഷേമപെൻഷൻ വാങ്ങുന്ന 62 ലക്ഷം പേരിൽ മസ്റ്ററിംഗ് നടത്തിയ മുഴുവൻ പേർക്കും തുക ലഭിക്കും. ബാങ്ക് അക്കൗണ്ട് നമ്പർ നൽകിയിട്ടുള്ളവർക്ക് അക്കൗണ്ട് വഴിയും മറ്റുള്ളവർക്ക് സഹകരണ സംഘങ്ങൾ വഴി നേരിട്ട് വീട്ടിലും പെൻഷൻ എത്തിക്കും. കുടിശികയുള്ള മൂന്ന് ഗഡു പിന്നീട് വിതരണം ചെയ്യും. ബഡ്ജറ്റിൽ പ്രഖ്യാപിച്ചതനുസരിച്ച് അതത് പെൻഷൻ വിതരണത്തിന് നടപടിയെടുത്തു വരികയാണെന്ന് കെ.എൻ. ബാലഗോപാൽ പറഞ്ഞു.