പെരുമ്പാവൂർ: പുല്ലുവഴിയിലെ ഋഷികുലം ട്രസ്റ്റ് ഇനി വർക്കല ശിവഗിരി മഠത്തിന്റെ ബ്രാഞ്ച് സ്ഥാപനം. ശ്രീനാരായണഗുരുദേവ ഭക്തനും മികച്ച സംഘാടകനുമായിരുന്ന എൻ.കെ. ശിവരാജന്റെ നേതൃത്വത്തിൽ 2004 ഒക്ടോബർ 14ന് സ്ഥാപിച്ചതാണ് ഋഷികുലം.
ഋഷികുലംട്രസ്റ്റിന്റെ ഭാവി പ്രവർത്തനങ്ങളെക്കുറിച്ച് ആലോചിക്കുന്നതിനും കർമ്മപദ്ധതികളെക്കുറിച്ച് ചർച്ച ചെയ്യുന്നതിനുമായി 7-ാം തീയതി ശിവഗിരി ധർമ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദയുടെ സാന്നിദ്ധ്യത്തിൽ പുല്ലുവഴി ഋഷികുലംട്രസ്റ്റ് ഓഡിറ്റോറിയത്തിൽ യോഗം ചേരും. ഋഷികുലം ട്രസ്റ്റും ശിവഗിരി മഠത്തിന്റെ ഭാഗമാകുന്നതോടെ ജില്ലയിൽ മഠത്തിന്റെ ആറാമത്തെ സ്ഥാപനമാകും ഋഷികുലം.
• ശിവരാജന്റെ സ്വപ്നപദ്ധതി
ജില്ലയിൽ നിരവധി ശ്രീനാരായണ പ്രസ്ഥാനങ്ങളുടെ പ്രാരംഭപ്രവർത്തനങ്ങൾക്ക് നേതൃത്വം നൽകിയ എൻ.കെ. ശിവരാജനാണ് ഋഷികുലം ട്രസ്റ്റിന്റെയും ശില്പി. പുല്ലുവഴിയിലെ പ്രശസ്ത വൈദ്യകുടുംബാംഗമായിരുന്നു എൻ.കെ. ശിവരാജൻ. ടെലികോം ഡിപ്പാർട്ട്മെന്റ് ചീഫ് എൻജിനിയറായി വിരമിച്ചശേഷം പൂർണസമയവും ശ്രീനാരായണ ധർമ്മപ്രചാരണത്തിന് ജീവിതം മാറ്റിവച്ചു. മാറ്റിവച്ച വൃക്കയുമായി രണ്ട് പതിറ്റാണ്ടിലേറെ ജീവിച്ച ശിവരാജൻ മരണംവരെ കർമ്മനിരതനായിരുന്നു. അവിവാഹിതനായ അദ്ദേഹം സന്ന്യാസതുല്യമായ ജീവിതമാണ് നയിച്ചത്. അദ്ദേഹത്തിന്റെ ഭൂമിയിലാണ് 2004ൽ ഋഷികുലം ആരംഭിച്ചത്. എം.സി റോഡിന്റെ അരികലെ ഈ മൂന്നേക്കർസ്ഥലവും മന്ദിരങ്ങളും ഉൾപ്പെടുന്ന വളപ്പ് മുതിർന്ന പൗരന്മാരുടെ കമ്മ്യൂണിറ്റി ലിംവിംഗ് എന്ന ആശയത്തിൽ വികസിപ്പിച്ചതാണ്. 36000 ചതുരശ്രഅടിയിലെ പൂർത്തിയാകാത്ത കെട്ടിടവും ഓഡിറ്റോറിയവും ഉൾപ്പടെയുള്ള കെട്ടിടങ്ങളാണ് ഇപ്പോൾ ഇവിടെയുള്ളത്. താൻ വിഭാവനം ചെയ്ത ഋഷികുലം പദ്ധതി പൂർത്തിയാകുംമുമ്പേ 2017 മേയ് മൂന്നിന് അദ്ദേഹം മരണത്തിന് കീഴടങ്ങി. ഇപ്പോൾ എൻ.കെ. കാർനിഷ് പ്രസിഡന്റായ സമിതിയാണ് ട്രസ്റ്റിനെ നയിക്കുന്നത്.
വിപുലമായ സൗഹൃദവലയത്തിനുടമയായിരുന്ന ശിവരാജൻ ആദ്യമായി തുടക്കമിട്ടത് തൃപ്പൂണിത്തുറ ശ്രീനാരായണ വിദ്യാപീഠമാണ്. പിന്നീട് കടയിരുപ്പിലെ ഗുരുകുലം എൻജിനിയറിംഗ് കോളേജ്, കോതമംഗലം നങ്ങേലിൽ ആയുർവേദ മെഡിക്കൽ കോളേജ്, പറവൂർ ചാലാക്ക ശ്രീനാരായണ മെഡിക്കൽ കോളേജ് തുടങ്ങിയവയുടെ ആദ്യകാല സാരഥികളിൽ ഒരാളാണ്.
പുല്ലുവഴിയിലെ ഋഷികുലത്തിൽ വൃദ്ധസദനവും പേയ്ഡ് റിട്ടയർമെന്റ് ഹോമും പോലുള്ള സേവനസംവിധാനങ്ങൾ ഒരുക്കാനാണ് ശിവഗിരിമഠം ആലോചിക്കുന്നത്.
സ്വാമി സച്ചിദാനന്ദ
പ്രസിഡന്റ്, ശിവഗിരി ധർമ്മസംഘം ട്രസ്റ്റ്
ശിവഗിരി മഠത്തിന്റെ ജില്ലയിലെ സ്ഥാപനങ്ങൾ
• ആലുവ അദ്വൈതാശ്രമം
• കാളികുളങ്ങര ക്ഷേത്രം
• എറണാകുളം ശങ്കരാനന്ദാശ്രമം
• എരൂർ നരസിംഹാശ്രമം
• ആലുവ ശിവഗിരി വിദ്യാനികേതൻ സ്കൂൾ
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |