കോട്ടയം : സാധാരണക്കാരുടെ ബഡ്ജറ്റ് താളം തെറ്റിച്ച് മത്സ്യം, പച്ചക്കറി വില കുതിച്ചുയരുന്നു. മോത, നെയ്മീൻ , വറ്റ, കാളാഞ്ചി തുടങ്ങിയ മേൽത്തരം ഇനങ്ങൾക്ക് 800 ന് മുകളിലാണ് വില. 400-450 രൂപ വരെ താഴ്ന്ന കരിമീൻ 580-600 ലേക്ക് എത്തി. ഡിമാൻഡ് കുറവുള്ള കേര, തള, ഓല തുടങ്ങിയവയ്ക്ക് 400 ന് മുകളിലാണ്. നാടൻ മത്തി കിട്ടാനില്ല. ചെറിയ മുള്ളൻ മത്തിക്ക് 220-240 രൂപയാണ്. അയല : 260, കണ്ണി അയല : 240, കിളി : 300 എന്നിങ്ങനെയാണ് വില.

തമിഴ്നാട്ടിലും വേനൽ ശക്തമായതാണ് പച്ചക്കറി വില ഉയരാൻ ഇടയാക്കിയത്. ബീൻസ് കിലോയ്ക്ക് 120 രൂപയാണ്. ചെറു നാരങ്ങ 240 രൂപയായി. കാരറ്റ് 80, പാവക്ക 90, തക്കാളി, ബീറ്റ് റൂട്ട് , കോവക്ക, വെണ്ടക്ക, കത്രിക്ക, മുരിങ്ങയ്ക്ക എന്നിവയ്ക്ക് 60 രൂപയാണ്. താരതമ്യേന വിലക്കുറവ് സവാളയ്ക്കാണ് 30 രൂപ.

''പച്ചക്കറി, മീൻ, ഇറച്ചി വില ഉയർന്നതിനൊപ്പം മറ്റു നിത്യോപയോഗ സാധന വിലയും വർദ്ധിച്ചു. സധാരണക്കാർക്ക് ജീവിക്കാൻ കഴിയാത്ത സ്ഥിതിയായി.

ചന്ദ്രശേഖരൻ (വ്യാപാരി)