കോഴിക്കോട് : സംസ്ഥാന സർക്കാരിന്റെ കീഴിൽ നടപ്പാക്കുന്ന മിഷൻ 1000 പദ്ധതിയിലേക്ക് ജില്ലയിൽ നിന്ന് തെരഞ്ഞെടുത്തത് 12 യൂണിറ്റുകൾ. 2023 - 24 സാമ്പത്തിക വർഷത്തിൽ തുടങ്ങി നാല് വർഷം ആകുമ്പോഴേക്കും യൂണിറ്റുകളുടെ വിറ്റുവരവ് 100 കോടി രൂപയാക്കി വർദ്ധിപ്പിക്കുകയാണ് ലക്ഷ്യം. പദ്ധതിയുടെ ഒന്നാം ഘട്ടത്തിൽ സംസ്ഥാനത്ത് നിന്ന് തെരഞ്ഞെടുത്ത 149 സംരംഭങ്ങളിലാണ് ജില്ലയിൽ നിന്നുള്ള 12 സംരംഭങ്ങൾ ഉൾപ്പെടുന്നത്.

ജില്ലയിൽ നിന്നും ഇതുവരെ തെരഞ്ഞെടുത്ത 12 യൂണിറ്റുകളിലായി നിലവിൽ ആകെ 15.5 കോടി രൂപ നിക്ഷേപമുണ്ട്. പദ്ധതി നടപ്പാക്കുന്നതിന്റെ ഭാഗമായി ഈ നിക്ഷേപം 50 കോടി രൂപയിലേക്ക് ഉയരുമെന്നാണ് പ്രതീക്ഷിക്കുന്നത്. 12 യൂണിറ്റുകളിൽ നിന്നുള്ള വാർഷിക വിറ്റുവരവ് 78 കോടി രൂപയിൽ നിന്നും 100 കോടിയിലേക്ക് ഉയരുമെന്നും പ്രതീക്ഷിക്കുന്നു. ഒപ്പം, നിലവിലെ 370 തൊഴിൽ ദിനങ്ങൾ 600 തൊഴിൽ ദിനങ്ങളായി വർദ്ധിക്കുകയും ചെയ്യും.

 സംരംഭങ്ങൾ

കോഴിക്കോട് താലൂക്ക് - അഞ്ച്

കൊയിലാണ്ടി - ആറ്

വടകര - ഒന്ന്

 ആരംഭിക്കുന്നത് വിവിധ വ്യവസായങ്ങൾ

മൂന്ന് ഭക്ഷ്യോത്പ്പന്ന നിർമ്മാണ യൂണിറ്റ്, രണ്ട് ഫാബ്രിക്കേറ്റഡ് മെറ്റൽ ഉൽപന്ന നിർമാണ യൂണിറ്റ്, രണ്ട് ഫാർമസ്യുട്ടിക്കൽസ് നിർമ്മാണ യൂണിറ്റ്, ഒന്ന് വീതം ഫർണിചർ നിർമ്മാണ യൂണിറ്റ്, പാദരക്ഷ നിർമ്മാണ യൂണിറ്റ്, കരിക്കിൽ നിന്നുള്ള പൾപ്പ് നിർമ്മാണ യൂണിറ്റ്, മെഡിക്കൽ ഉപകരണങ്ങളുടെ നിർമ്മാണ യൂണിറ്റ്, ലാബ് ഉപകരണങ്ങളുടെ നിർമ്മാണ യൂണിറ്റ് എന്നിവയാണ് സംരംഭങ്ങൾ.

 ആധുനിക വത്കരണത്തിനും അവസരം

സംരംഭങ്ങൾക്ക് നിലവിലുള്ള നിക്ഷേപത്തിന് പുറമേ വിപുലീകരണമോ ആധുനികവത്ക്കരണമോ വൈവിദ്ധ്യവത്ക്കരണമോ പദ്ധതി മുഖേന നടപ്പാക്കാം. മിഷൻ 1000 ന്റെ ഭാഗമായിട്ടുള്ള യൂണിറ്റുകൾ ആരംഭിച്ച് നാലു വർഷക്കാലയളവിനുള്ളിൽ പൂർത്തിയാക്കുകയും ഓരോ ഘട്ടങ്ങളിലുമായി സർക്കാരിന്റെ സാമ്പത്തിക സഹായം നേടാവുന്നതുമാണ്. ഇപ്രകാരമുള്ള സംരംഭങ്ങൾക്ക് പദ്ധതി രേഖ തയാറാക്കുന്നതിന് ഒരു ലക്ഷം രൂപ വരെ സാമ്പത്തിക സഹായം നൽകും. പ്രോജക്ട് നടപ്പാക്കുന്ന മുറയ്ക്ക് പ്ലാന്റ് ആൻഡ് മെഷീനറിയിൽ ഉണ്ടാവുന്ന അധിക നിക്ഷേപത്തിന്റെ അടിസ്ഥാനത്തിൽ 40 ശതമാനം വരെ (പരമാവധി രണ്ടു കോടി രൂപ) സബ്‌സിഡി ലഭിക്കും. ഇതിനുപുറമെ, പ്രവർത്തന മൂലധനത്തിന്മേൽ പരമാവധി 50 ലക്ഷം രൂപ വരെ ഗ്രാന്റും ലഭിക്കും.

രണ്ടാം ഘട്ടത്തിലേക്ക് അപേക്ഷ

മിഷൻ 1000 പദ്ധതിയുടെ രണ്ടാം ഘട്ടത്തിലേക്ക് അപേക്ഷ ക്ഷണിച്ചിട്ടുണ്ട്. കുറഞ്ഞത് മൂന്ന് വർഷമായി പ്രവർത്തിച്ചു കൊണ്ടിരിക്കുന്ന എം.എസ്.എം.ഇകളെയാണ് പദ്ധതിയുടെ ഉപഭോക്താക്കളായി ഉൾപ്പെടുത്തിയിട്ടുള്ളത്. താത്പ്പര്യമുള്ള എം.എസ്.എം.ഇകൾക്ക് www.industry.kerala എന്ന പോർട്ടൽ വഴി രജിസ്റ്റർ ചെയ്യാം.