മലപ്പുറം: സമസ്‌ത നേതാക്കൾക്കെതിരെയും സുപ്രഭാതം പത്രത്തിനെതിരെയും പ്രസ്‌താവന നടത്തിയ ഇ.കെ വിഭാഗം സമസ്‌ത കേന്ദ്ര മുഷാവറ അംഗവും സുപ്രഭാതം ചീഫ് എഡിറ്ററുമായ ബഹാവുദ്ദീൻ മുഹമ്മദ് നദ്‌വിയോട് നേതൃത്വം വിശദീകരണം തേടി. 48 മണിക്കൂറിനകം വിശദീകരണം നൽകണം. സമസ്‌തയിൽ ചിലർ ഇടതുപക്ഷവുമായി അടുക്കാൻ ശ്രമിക്കുന്നുണ്ടെന്ന് അദ്ദേഹം വിമർശിച്ചതിന് പിന്നാലെയാണ് നടപടി. സുപ്രഭാതം പത്രത്തിൽ നയം മാറ്റമുണ്ടായെന്നും ഗൾഫ് എഡിഷൻ ഉദ്ഘാടനച്ചടങ്ങ് ഇതിന് തെളിവാണെന്നും അദ്ദേഹം പറഞ്ഞിരുന്നു. ചടങ്ങിൽ മന്ത്രി പി.എ.മുഹമ്മദ് റിയാസ് പങ്കെടുത്തത് ചൂണ്ടിക്കാണിച്ചായിരുന്നു വിമർശനം. അതുകൊണ്ടാണ് ചടങ്ങിൽ നിന്നും വിട്ടുനിന്നത്. അടുത്ത മുഷാവറ യോഗത്തിൽ ഇക്കാര്യം ഉന്നയിക്കുമെന്നും അദ്ദേഹം പറഞ്ഞിരുന്നു.