കണ്ണൂർ: ആവശ്യത്തിനുള്ള സ്റ്റോക്ക് ലഭിക്കാത്തതിനാൽ മണ്ണെണ്ണ എടുക്കുന്നത് നിർത്തി റേഷൻ വ്യാപാരികൾ.ഇതോടെ ഒരു കാലഘട്ടത്തിൽ ഭക്ഷ്യധാന്യവിതരണം പോലെ കാര്യക്ഷമമമായി നടന്നിരുന്ന മണ്ണെണ്ണവിതരണം റേഷൻ കടയിൽ നിന്ന് പൂർണമായി ഇല്ലാതാകുമെന്ന സ്ഥിതിയിലേക്കാണ് നീങ്ങുന്നത്. മണ്ണെണ്ണ വിൽക്കാൻ ലൈസൻസും അടച്ചുറപ്പുള്ള പ്രത്യേക മുറിയും വേണമെന്ന നിയമം നിർബന്ധമാക്കിയതാണ് വ്യാപാരികളുടെ പിന്മാറ്റത്തിനുള്ള മറ്റൊരു കാരണം.

കേന്ദ്രസർക്കാർ ഭക്ഷ്യസുരക്ഷാ നിയമം നടപ്പിലാക്കിയതോടെ റേഷൻ സാധന വിൽപ്പനയ്ക്ക് പ്രത്യേക ലൈസൻസ് സംവിധാനം ഒഴിവാക്കിയിരുന്നു. ഇതുകാരണം ഒട്ടുമിക്ക റേഷൻ വ്യാപാരികളും ലൈസൻസ് പുതുക്കിയിട്ടില്ല.ഫുഡ് ആൻഡ് സേഫ്റ്റി രജിസ്‌ട്രേഷൻ മാത്രമാണ് ഇവർ എടുത്തിട്ടുള്ളത്.എന്നാൽ മണ്ണെണ്ണവിതരണത്തിന് ലൈസൻസും മുറിയും വേണമെന്ന നിഷ്കകർഷ റേഷൻ കടയുടമകൾക്ക് സ്വീകാര്യമായിട്ടില്ല. ആവശ്യത്തിന് സ്റ്റോക്ക് ലഭിക്കാത്ത സ്ഥിതിയിൽ ലൈസൻസും മുറിയും ഒരുക്കുന്നത് നഷ്ടമാണെന്ന് ഇവർ പറയുന്നു.

2024-25 വർഷത്തിലെ മണ്ണെണ്ണ അലോട്ട്‌മെന്റ് 1944ൽ നിന്നു 780 കിലോലിറ്ററായി കുറച്ചിരുന്നു. അതിനാൽ സംഭരണവും വിതരണവും പ്രായോഗികമല്ലെന്നാണ് വ്യാപാരികളുടെ അഭിപ്രായം.മൂന്നുമാസം കൂടുമ്പോഴാണ് റേഷൻകടകളിൽ മണ്ണെണ്ണ വിതരണം നടക്കുന്നത്. ഇപ്പോൾ ഏപ്രിൽ, മേയ്, ജൂൺ മാസങ്ങളിലെ വിതരണമാണ് നടന്നുകൊണ്ടിരിക്കുന്നത്. അടുത്ത വിതരണം നടക്കേണ്ടത് സെപ്തംബറിലാണ്.

പിങ്ക് ,​മഞ്ഞ,​വിഭാഗങ്ങൾക്ക് മാത്രം

മുൻഗണനാ വിഭാഗങ്ങളായ പിങ്ക്, മഞ്ഞ (പി.എച്ച്.എച്ച്, എ.എ.വൈ) കാർഡുടമകളാണ് മണ്ണെണ്ണയ്ക്ക് അർഹർ. ഇവർക്ക് മൂന്നുമാസം കൂടുമ്പോൾ അരലിറ്റർ മണ്ണെണ്ണയാണ് ലഭിക്കുന്നത്. എന്നാൽ മണ്ണെണ്ണ വ്യാപാരികൾക്ക് മൂന്നുമാസത്തിൽ ഒരിക്കൽപ്പോലും മണ്ണെണ്ണ അലോട്ടുമെന്റ് ലഭിക്കാറില്ല. ഒരുലോഡിൽ നിന്ന് തൊഴിലാളികളുടെ ശമ്പളം, കടവാടക, മുടക്കുമുതലിന്റെ പലിശ, ബാങ്ക് പലിശ എന്നിവയെല്ലാം നൽകാൻ സാധിക്കുന്നില്ലെന്ന നിലപാടിലാണ് വ്യാപാരികൾ.

കമ്മീഷൻ തുക പുതുക്കിയില്ല

2019 ന് ശേഷം വ്യാപാരികളുടെ കമ്മീഷൻ തുക പുതുക്കിയിട്ടില്ല. സംഭരണ ലൈസൻസ് 360 രൂപയിൽ നിന്ന് 12000 ആയി വർദ്ധിപ്പിക്കുകയും ചെയ്തു. ഒരു ഡിപ്പോ ലാഭകരമായി നടത്താൻ 72കിലോലിറ്റർ മണ്ണെണ്ണ വേണമെന്ന് അഖിലേന്ത്യാ തലത്തിൽ നടത്തിയ പഠനത്തിൽ പറയുന്നു. എന്നാൽ മൂന്ന് മാസത്തിലൊരിക്കൽ 12 ക കിലോലിറ്റർ മണ്ണെണ്ണ ലഭിക്കാത്ത ഡീലർമാരാണ് കൂടുതൽ. ചില്ലറവ്യാപാരിക്ക് 10 മുതൽ 50 ലിറ്റർ വരെയാണ് അലോട്ട്‌മെന്റ് ലഭിക്കുന്നത്. ശരാശരി 15 കിലോമറ്റർ ദൂരെ പോയിവേണം മണ്ണെണ്ണ എടുക്കാൻ.ബാഷ്പീകരണനഷ്ടവും കൂടി കണക്കാക്കുമ്പോൾ വ്യാപാരികൾ ഇതിന് തയാറാവുന്നില്ല.

മുൻഗണനാ കാർഡുകൾ ആകെ 4182341

എ.എ.വൈ 590390

പി.എച്ച്.എച്ച് 3591951

അരലിറ്രർ മണ്ണെണ്ണയുടെ വില 35.50