ഇന്ത്യയും യു.എസും ഒന്നിച്ചാൽ സമാധാനവും സമൃദ്ധിയും: രാജ്‌നാഥ് സിംഗ്

വാഷിംഗ്ടൺ: ലോകത്ത് സമാധാനവും സമൃദ്ധിയും സ്ഥിരതയും നടപ്പാക്കാനുള്ള ശക്തി ഇന്ത്യ - യു.എസ് കൂട്ടുകെട്ടിനുണ്ടെന്ന് താൻ വിശ്വസിക്കുന്നതായി പ്രതിരോധ മന്ത്രി രാജ്‌നാഥ് സിംഗ്. ഇന്നലെ വാഷിംഗ്ടൺ ഡി.സിയിൽ ഇന്ത്യൻ സമൂഹത്തെ അഭിസംബോധന ചെയ്യുകയായിരുന്നു അദ്ദേഹം.

'വഞ്ചന നമ്മുടെ സ്വഭാവത്തിലില്ല. നാം ഒരുപക്ഷേ, വഞ്ചിക്കപ്പെടാം. എന്നാൽ നമുക്ക് ഒരിക്കലും മ​റ്റുള്ളവരെ വഞ്ചിക്കാൻ കഴിയില്ല. ഇതാണ് ലോകത്തിന് നൽകേണ്ട സന്ദേശം." അദ്ദേഹം പറഞ്ഞു.

അന്താരാഷ്ട്ര സമൂഹത്തിൽ ഇന്ത്യയുടെ യശ്ശസ് ഉയരുകയാണെന്നും അദ്ദേഹം ചൂണ്ടിക്കാട്ടി. ഇന്ന് ആഗോള വേദിയിൽ ഇന്ത്യയുടെ വാക്കുകളിലേക്ക് ലോക രാജ്യങ്ങൾ ശ്രദ്ധയോടെ കാതോർക്കുന്നു.

2027ഓടെ ലോകത്തെ ഏ​റ്റവും മികച്ച മൂന്ന് സമ്പദ്‌വ്യവസ്ഥകളിൽ ഒന്നായി ഇന്ത്യ മാറുമെന്നും ആർക്കും അത് തടയാനാവില്ലെന്നും രാജ്‌നാഥ് സിംഗ് കൂട്ടിച്ചേർത്തു. ഡിഫൻസ് സെക്രട്ടറി ലോയ്‌‌ഡ് ഓസ്റ്റിന്റെ ക്ഷണപ്രകാരം നാല് ദിവസത്തെ സന്ദർശനത്തിനായി ഇന്നലെയാണ് അദ്ദേഹം യു.എസിലെത്തിയത്. ഓസ്​റ്റിൻ അടക്കമുള്ള ഉന്നത നേതാക്കളുമായി അദ്ദേഹം കൂടിക്കാഴ്ച നടത്തും.