'ഓർമ്മിക്കാൻ ഒരു ഓണം 2024' സെപ്തംബർ 9 മുതൽ 14 വരെ

നെടുമ്പാശേരി: പാറക്കടവ് ബ്ലോക്ക് പഞ്ചായത്തിന്റെ നേതൃത്വത്തിൽ സെപ്തംബർ 9 മുതൽ 14 വരെ അത്താണി അമല തീയേറ്ററിന് സമീപം ഓണം വിപണന പ്രദർശനമേള 'ഓർമ്മിക്കാൻ ഒരു ഓണം 2024' സംഘടിപ്പിക്കുമെന്ന് പ്രസിഡന്റ് ടി.വി. പ്രദീഷ് വാർത്താസമ്മേളനത്തിൽ അറിയിച്ചു.

ഒമ്പതിന് വൈകിട്ട് അഞ്ചിന് മന്ത്രി പി. രാജീവ് മേള ഉദ്ഘാടനം ചെയ്യും. അൻവർ സാദത്ത് എം.എൽ.എ മുഖ്യാതിഥിയാകും. 10ന് വൈകിട്ട് അഞ്ചിന് അംഗനവാടി പ്രവർത്തകരുടെ സംഗമം റോജി എം. ജോൺ എം.എൽ.എ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡണ്ട് മനോജ് മൂത്തേടൻ മുഖ്യാതിഥിയാകും. 11ന് ആരോഗ്യ പ്രവർത്തകരുടെ സംഗമം ബെന്നി ബഹനാൻ എം.പി ഉദ്ഘാടനം ചെയ്യും. ബാംബൂ കോർപ്പറേഷൻ ചെയർമാൻ ടി.കെ. മോഹനൻ മുഖ്യാതിഥിയാകും. 12ന് വൈകിട്ട് 5.30ന് ജനപ്രതിനിധി സംഗമം 'ഫോർ ദി പീപ്പിൾ' മന്ത്രി കെ. രാജൻ ഉദ്ഘാടനം ചെയ്യും. ഹൈബി ഈഡൻ എം.പി മുഖ്യാതിഥിയാകും. 13ന് വൈകിട്ട് അഞ്ചിന് യുവജനസംഗമം അൻവർ സാദത്ത് എം.എൽ.എ ഉദ്ഘാടനം ചെയ്യും. യുവജനക്ഷേമ ബോർഡ് വൈസ് ചെയർമാൻ എസ്. സതീഷ് മുഖ്യാതിഥിയാകും. മേളയുടെ സമാപന സമ്മേളനം 14ന് വൈകിട്ട് ഏഴിന് പ്രതിപക്ഷ നേതാവ് വി.ഡി. സതീശൻ ഉദ്ഘാടനം ചെയ്യും. എഫ്.ഐ.ടി ചെയർമാൻ ആർ. അനിൽകുമാർ മുഖ്യാതിഥിയാകും.
പ്രാദേശിക സംരംഭകരുടെ ഉത്പന്നങ്ങളും പരമ്പരാഗത കൈത്തൊഴിലുകാരുടെ ഉത്പന്നങ്ങളും വിവിധ സ്റ്റാളുകളിൽ ലഭ്യമാകും. ദിവസവും കലാസാംസ്‌കാരിക പരിപാടികളും നടക്കും.

വയനാടിന് ഒരു കൈത്താങ്ങുമായി മാഞ്ഞാലി എസ്.എൻ ജിസ്റ്റ് ക്യാമ്പസിലെ എൻ.എസ്.എസ് യൂണിറ്റ് ഒരുക്കുന്ന സ്റ്റാളും മേളയുടെ ഭാഗമായുണ്ട്.