യു.പി.എസ്.സി യോഗം അടുത്തയാഴ്ച

തിരുവനന്തപുരം: അടുത്ത പൊലീസ് മേധാവിയാകേണ്ടവരുടെ ചുരുക്കപ്പട്ടിക തയ്യാറാക്കാനുള്ള യു.പി.എസ്.സി യോഗം അടുത്തയാഴ്ച ഡൽഹിയിൽ ചേരും. 6ഐ.പി.എസ് ഉദ്യോഗസ്ഥരുടെ പട്ടിക സർക്കാർ കേന്ദ്രത്തിന് കൈമാറിയിട്ടുണ്ട്. യു.പി.എസ്.സി ചെയർമാൻ, കേന്ദ്ര ആഭ്യന്തര സെക്രട്ടറി, സംസ്ഥാന ഡി.ജി.പി, ചീഫ്സെക്രട്ടറി, കേന്ദ്രസേനകളിലൊന്നിന്റെ മേധാവി എന്നിവരുടെ സമിതിയാണ് മൂന്നംഗ ചുരുക്കപ്പട്ടികയുണ്ടാക്കുക. ഇതിലൊരാളെ സംസ്ഥാന സർക്കാരിന് പൊലീസ് മേധാവിയായി നിയമിക്കാം. നിലവിലെ പൊലീസ് മേധാവി ഷേഖ് ദർവേഷ് സാഹിബിന്റെ കാലാവധി 30ന് കഴിയും. ഉദ്യോഗസ്ഥരുടെ സീനിയോറിറ്റിയും പ്രവർത്തനവും സ്വഭാവശുദ്ധിയും പരിഗണിച്ചാണ് യു.പി.എസ്.സി മൂന്നംഗ പട്ടിക തയ്യാറാക്കുക. ആറംഗ പട്ടികയിലുള്ള സുരേഷ് രാജ് പുരോഹിത് (എസ്.പി.ജി), റവാഡ ചന്ദ്രശേഖർ (ഐ.ബി) എന്നിവർ കേന്ദ്ര ഡെപ്യൂട്ടേഷനിലാണ്. പൊലീസ് മേധാവിയാക്കിയാൽ കേരളത്തിൽ തിരിച്ചെത്താമെന്ന് ഇവർ രേഖാമൂലം അറിയിച്ചിട്ടുണ്ട്. അതിനാലാണ് പട്ടികയിലുൾപ്പെടുത്തിയത്. ഡി.ജി.പിമാരായ നിതിൻ അഗർവാൾ,യോഗേഷ് ഗുപ്ത,മനോജ് എബ്രഹാം,എഡി.ജി.പി എം.ആർ.അജിത്കുമാർ എന്നിവരാണ് പട്ടികയിലെ മറ്റുള്ളവർ.