ശബരിമല നട തുറന്നു, നവഗ്രഹ പ്രതിഷ്ഠ നാളെ

ശബരിമല: പുതിയ നവഗ്രഹ ശ്രീകോവിലിലെ പ്രതിഷ്ഠയോടനുബന്ധിച്ചുള്ള പൂജകൾക്കായി ശബരിമല നട തുറന്നു. തന്ത്രി കണ്ഠരര് രാജീവരുടെ സാന്നിദ്ധ്യത്തിൽ മേൽശാന്തി അരുൺകുമാർ നമ്പൂതിരി നടതുറന്ന് ശ്രീകോവിലിൽ ദീപം തെളിച്ചു. തുടർന്ന് പതിനെട്ടാംപടിക്ക് താഴെ ആഴിയിൽ അഗ്നി പകർന്നു. ശുദ്ധിക്രിയകൾ ഇന്ന് വൈകിട്ട് 6. 30ന് ആരംഭിക്കും. നാളെ പ്രതിഷ്ഠയോടനുബന്ധിച്ചുള്ള പ്രത്യേക പൂജകൾ നടക്കും. 13ന് പകൽ 11നും 12നും മദ്ധ്യേയുള്ള കന്നി രാശി മുഹൂർത്തത്തിലാണ് പ്രതിഷ്ഠ. രാവിലെ ഗണപതി ഹോമം, ശയ്യയിൽ ഉഷഃപൂജ, മരപ്പാണി തുടങ്ങിയ ചടങ്ങുകൾക്ക് ശേഷമാണ് പ്രതിഷ്ഠാ കർമ്മം. മാളികപ്പുറത്തിന് സമീപമാണ് പുതിയ നവഗ്രഹ ശ്രീകോവിൽ . പൂജകൾ പൂർത്തിയാക്കി 13 ന് രാത്രി 10ന് നട അടയ്ക്കും.