കോന്നി ഗവ.മെഡിക്കൽ കോളേജ് ബസ് സ്റ്റാൻഡ് നിർമാണോദ്ഘാടനം

കോന്നി : കോന്നി ഗവ.മെഡിക്കൽ കോളേജ് ബസ് സ്റ്റാൻഡ് നിർമ്മാണ ഉദ്ഘാടനം അഡ്വ.കെ.യു.ജനീഷ് കുമാർ എം.എൽ.എ നിർവഹിച്ചു. അരൂവാപ്പുലം പഞ്ചായത്ത് വൈസ് പ്രസിഡന്റ് മണിയമ്മ രാമചന്ദ്രൻ നായർ അദ്ധ്യക്ഷതവഹിച്ചു. ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ വർഗീസ് ബേബി, പഞ്ചായത്ത്‌ അംഗങ്ങളായ ശ്രീകുമാർ, ഷീബ, സിന്ധു, മിനി രാജീവ്, ജോജു വർഗീസ്, ശ്രീലത, മെഡിക്കൽ കോളേജ് വൈസ് പ്രിൻസിപ്പൽ ഡോ.സെസി ജോബ്, മെഡിക്കൽ കോളേജ് സൂപ്രണ്ട് ഡോ.ഷാജി, പൊതുമരാമത്ത് എക്സിക്യൂട്ടീവ് എൻജിനീയർ ബാബുരാജൻ, പൊതുമരാമത്ത് അസി.എക്സിക്യൂട്ടീവ് എൻജിനീയർ മുരുകേഷ് കുമാർ, അസി.എൻജിനീയർ രൂപക്ക് ജോൺ എന്നിവർ സംസാരിച്ചു.

മെഡിക്കൽ കോളജിന് മുൻവശത്തുള്ള 50 സെന്റ് റവന്യൂ ഭൂമിയിലാണ് ബസ് സ്റ്റാൻഡും അമിനിറ്റി സെന്ററും നിർമിക്കുന്നത്. കോന്നി മെഡിക്കൽ കോളേജിൽ തിരക്കേറിയതോടെ ധാരാളം കെ.എസ്.ആർ.ടി.സി ബസുകളും പ്രൈവറ്റ് ബസുകളും സർവീസ് നടത്തുന്നുണ്ട്. ഇവയെല്ലാം മെഡിക്കൽ കോളജിനുള്ളിൽ പ്രവേശിച്ച് കാഷ്വാലിറ്റിയുടെ മുന്നിലാണ് പാർക്ക് ചെയ്യുന്നത്. മെഡിക്കൽ കോളജിലെ പ്രവേശന കവാടവും മതിലും പൂർത്തിയാകുന്നതോടെ സർവീസ് ബസുകൾ ആശുപത്രി കോമ്പൗണ്ടിനുള്ളിൽ പ്രവേശിക്കുന്നത് വലിയ ബുദ്ധിമുട്ടും തിരക്കും സൃഷ്ടിക്കും. ഇതിന് പരിഹാരമായാണ് മെഡിക്കൽ കോളേജിന്റെ മുന്നിലുള്ള 50 സെന്റ് റവന്യൂ ഭൂമിയിൽ എം.എൽ.എ ഫണ്ടിൽ നിന്നും ഒരു കോടി രൂപ മുടക്കി സ്റ്റാൻഡും അമിനിറ്റി സെന്ററും നിർമ്മിക്കുന്നത്.