ഇരുപത് കോടി നാമജപ പൂർണതയിൽ സഹസ്രനാമജപയജ്ഞം നാളെ

തിരുവനന്തപുരം: ശ്രീപദ്മനാഭസ്വാമി ക്ഷേത്രത്തിൽ 2024 വിഷുവിന് ആരംഭിച്ച്, കുലശേഖരമണ്ഡപത്തിൽ നടന്നുവരുന്ന വിഷ്ണുസഹസ്രനാമ നിത്യജപം ഇരുപതുകോടി നാമജപം പൂർത്തിയാകുന്നു. ശ്രാവണപൂർണിമയായ നാളെ രാവിലെ 8.30ന് ശീവേലിപ്പുരയിൽ ആയിരക്കണക്കിന് ഭക്തജനങ്ങൾ പ്രദക്ഷിണമായി ഇരുന്നുകൊണ്ട് മൂന്ന് ആവർത്തി സഹസ്രനാമം ജപിക്കും. രാവിലെ 6 മുതൽ ജപത്തിനുള്ള സ്പോട്ട് രജിസ്ട്രേഷൻ കൗണ്ടർ പ്രവർത്തിക്കും. ശ്രീപദ്മനാഭ ഭക്തമണ്ഡലിയുടെ നേതൃത്വത്തിൽ നടക്കുന്ന മൂന്നാംഘട്ടം സമർപ്പണമാണിത്. പാലക്കാട് ദയാനന്ദാശ്രമം മഠാധിപതി സ്വാമി കൃഷ്ണാത്മാനന്ദ സരസ്വതി നേതൃത്വം നൽകും.പങ്കെടുക്കുന്ന ഭക്തജനങ്ങൾക്കുള്ള ക്രമീകരണങ്ങൾ ഒരുക്കിയതായി ക്ഷേത്രം ഭാരവാഹികളും ഭക്തമണ്ഡലി പ്രവർത്തകരും അറിയിച്ചു.

ജപത്തിനും ദർശനത്തിനും ശേഷം വടക്കേനടയിലെ സമർപ്പണസഭയിൽ ക്ഷേത്രം തന്ത്രിവര്യൻ നെടുമ്പിള്ളി തരണനല്ലൂർ സതീശൻ നമ്പൂതിരിപ്പാട് ദീപം തെളിക്കും. പൂയംതിരുനാൾ ഗൗരി പാർവതിബായി, അശ്വതി തിരുനാൾ ഗൗരി ലക്ഷ്മിബായി,ആദിത്യവർമ്മ,ക്ഷേത്രഭരണസമിതി അംഗങ്ങളായ കരമന ജയൻ,എ.വേലപ്പൻനായർ,ക്ഷേത്രം എക്സിക്യൂട്ടീവ് ഓഫീസർ ബി.മഹേഷ് എന്നിവർ പങ്കെടുക്കും. ദർശന സമയങ്ങളിൽ മാറ്റമില്ല.