ഉദ്യാന വിരുന്നിൻ്റെ ശതാബ്ദി ആഘോഷം

കൊടുങ്ങല്ലൂർ: ആനപ്പുഴ പണ്ഡിറ്റ് കറുപ്പൻ വായനശാലയുടെ ആഭിമുഖ്യത്തിൽ പണ്ഡിറ്റ് കറുപ്പന്റെ പ്രതിഷേധ ഖണ്ഡകാവ്യമായ ഉദ്യാന വിരുന്നിന്റെ ഒരു വർഷം നീണ്ടുനിൽക്കുന്ന പരിപാടികളുടെ ആരംഭം കെ.കെ.ടി.എം ഗവ. കോളേജ് വൈസ് പ്രിൻസിപ്പൽ ഡോ. ജി.ഉഷാകുമാരി ഉദ്ഘാടനം ചെയ്തു. 100 വർഷം മുമ്പ് കോളിളക്കം സൃഷ്ടിച്ച ആ കവിത ഇന്നും തിരമാല പോലെ ഈ സമൂഹത്തിൽ ഇപ്പോഴും അലയടിച്ചു കൊണ്ടേയിരിക്കുന്നുവെന്ന് സമ്മേളനം ഉദ്ഘാടനം ചെയ്തുകൊണ്ട് ജി.ഉഷാകുമാരി അഭിപ്രായപ്പെട്ടു. ഡോ. സ്വപ്ന, ഡോ. രമ്യ, തങ്കരാജ് ആനപ്പുഴ എന്നിവർ സംസാരിച്ചു. എൻ.എച്ച്.സാംസൺ അദ്ധ്യക്ഷത വഹിച്ചു. വായനശാല സെക്രട്ടറി യു.ടി.പ്രേംനാഥ് സ്വാഗതവും അക്ഷദ് ബാബു നന്ദിയും പറഞ്ഞു.