'പാപ്പ ബുക്ക" സി​നി​മാ പ്രദർശനം തി​ങ്കളാഴ്ച

കൊച്ചി​: ഡോ. ബിജു ദാമോദരൻ സംവി​ധാനം ചെയ്ത പപ്പുവ ന്യൂ ഗിനിയ- ഇന്ത്യ സംയുക്ത ചലച്ചിത്രം 'പാപ്പ ബുക്ക" തി​ങ്കളാഴ്ച കൊച്ചി​യി​ൽ പ്രദർശി​പ്പി​ക്കും. തിങ്കളാഴ്ച വൈകീട്ട് 5.45ന് എറണാകുളം കാരി​ക്കാമുറി​ ചാവറ ഡോൾബി തീയേറ്ററിലാണ് പ്രദർശനം. പ്രകാശ് ബാരെ, റിതാബാരി ചക്രബർത്തി, പപ്പുവ ന്യൂ ഗിനിയയിലെ സിനോ ബോബോറോ എന്നിവരാണ് അഭിനേതാക്കൾ.

രണ്ടാം ലോക മഹായുദ്ധത്തിൽ സഖ്യകക്ഷികൾക്കുവേണ്ടി യുദ്ധത്തിനു പോയി,​ തിരിച്ചു വരാത്ത ഇന്ത്യൻ പട്ടാളക്കാരുടെ മറക്കപ്പെട്ട സത്യങ്ങളെത്തേടി രണ്ട് ഇന്ത്യൻ ചരിത്രകാരന്മാർ പപ്പുവ ന്യൂ ഗിനിയയിൽ നടത്തുന്ന യാത്രയാണ് പ്രമേയം. പ്രദർശനത്തിനു ശേഷം സംവിധായകൻ, അഭിനേതാക്കൾ, പിന്നണി പ്രവർത്തകർ തുടങ്ങിയവർ പ്രേക്ഷകരുമായി സംവദിക്കും.
2025 ഓസ്കാറി​ലെ മികച്ച വിദേശഭാഷാ ചിത്രത്തിനായുള്ള പപ്പുവ ന്യൂ ഗിനിയയുടെ ഔദ്യോഗിക എൻട്രി ആയിരുന്ന ഈ ചിത്രം. ബെലാറസ് 'മിൻസ്ക്" ഫെസ്റ്റിവലിൽ സ്പെഷ്യൽ ജൂറി പുരസ്‌കാരം നേടിയ ചി​ത്രം ഈ മാസം നടക്കുന്ന ധാക്ക ഇന്റർനാഷണൽ ഫിലിം ഫെസ്റ്റിവലിൽ ഏഷ്യൻ കോമ്പറ്റീഷൻ വിഭാഗത്തിലുണ്ട്. ഗോവ ഇന്റർനാഷണൽ ഫിലിം ഫെസ്റ്റിവലി​ൽ റെഡ് കാർപെറ്റ് എൻട്രി ആയിരുന്നു.