കല്ലുംതാഴം വഴി ഗതാഗതനിയന്ത്രണം ഇന്ന് മുതൽ

കൊല്ലം: ദേശീയപാത അറ്റകുറ്റപണിയുമായി ബന്ധപ്പെട്ട് കല്ലുംതാഴം വഴിയുള്ള ഗതാഗതനിയന്ത്രണം ഇന്ന് മുതൽ പ്രാബല്യത്തിൽ. മാർച്ച് 31 വരെയാണ് നിർമ്മാണം. ഇതിന് അനുസൃതമായ നിയന്ത്രണ- നിരോധനരീതികളാകും നടപ്പിലാക്കുക. പാൽക്കുളങ്ങര-ദേശീയപാത അപ്രോച്ച്‌റോഡുകൾ തമ്മിൽചേർത്തുള്ള ഗതാഗതക്രമീകരണം 28ന് മുമ്പ് പൂർത്തിയാക്കും. പുളിയത്ത്മുക്ക്-കല്ലുംതാഴം റോഡും ഇതേകാലയളവിൽ യാത്രായോഗ്യമാക്കും. സാഹചര്യത്തിനനുസൃതമായി റെയിൽ ലെവൽക്രോസ് അധികസമയം തുറന്ന് നൽകും. ഈ സമയപരിധിക്കുള്ളിൽ കോർപ്പറേഷന്റെ ഡ്രെയിനേജ് ജോലികൾ പൂർത്തിയാക്കാൻ കളക്ടർ നിർദേശിച്ചിട്ടുണ്ട്. കല്ലുംതാഴം-അയത്തിൽ ജംഗ്ഷനുകളിലെ അടിപ്പാത ടാറിട്ട് ഇരുവശത്തേക്കും ഗതാഗതം സാദ്ധ്യമാക്കുന്നതിനുള്ള നടപടികളും അനുബന്ധമായി ഉണ്ടാകും. ഇന്ന് മുതൽ 28 വരെ രാത്രികാല നിർമാണപ്രവർത്തനങ്ങൾക്കായി രാത്രി 9 മുതൽ രാവിലെ 6 വരെ ഗതാഗതം നിരോധിക്കും. മാർച്ച് ഒന്ന് മുതൽ 31 വരെയാണ് പൂർണ ഗതാഗതനിരോധനം. ഗതാഗതം ക്രമീകരിക്കുന്നതിന്റെഭാഗമായി 30 ട്രാഫിക് വാർഡന്മാരെ നിയോഗിക്കും. വഴിതിരിച്ചുവിടാനുള്ള സൈൻബോർഡുകളും സ്ഥാപിക്കും. പരീക്ഷ കാലയളവിൽ വിദ്യാർഥികൾക്ക് ബുദ്ധിമുട്ടുണ്ടാകാത്തവിധം രാവിലെ 10 വരെ അധിക ഗതാഗതസൗകര്യവും ഒരുക്കും.

എറണാകുളത്ത്‌നിന്നും തിരുവനന്തപുരത്തേക്ക് പോകുന്ന ഹെവി/മൾട്ടിപ്പിൾ ആക്സിൽ വാഹനങ്ങൾ ചവറ കെ.എം.എം.എൽ ഭാഗത്ത്നിന്ന് ശാസ്താംകോട്ട- ഭരണിക്കാവ്-കണ്ണനല്ലൂർ വഴി കടത്തിവിടും.

 തിരുവനന്തപുരത്ത്‌നിന്നും എറണാകുളത്തേക്ക്‌പോകുന്ന വാഹനങ്ങൾ കൊട്ടിയത്ത്‌നിന്ന് തിരിഞ്ഞ് കണ്ണനല്ലൂർ -ഭരണിക്കാവ്-ശാസ്താംകോട്ട-ചവറ കെ.എം.എം.എൽ വഴി എൻ.എച്ചിലേക്ക് പ്രവേശിക്കുന്നരീതിയിലാണ് ക്രമീകരണം.