ഏപ്രിൽ ഒന്ന് മുതൽ ധന മേഖലയിൽ വിപുല മാറ്റങ്ങൾ

ബാങ്കിംഗ്, നികുതി ചട്ടങ്ങൾ പുതുക്കി

കൊച്ചി: ഏപ്രിൽ ഒന്ന് മുതൽ വിപുലമായ മാറ്റങ്ങളാണ് ധനകാര്യ, സാമ്പത്തിക മേഖലകളിലുണ്ടാകുന്നത്. ബാങ്കിംഗ്, ആദായ നികുതി, സ്വർണ പണയം, ടോളുകൾ, വാഹനാപകട ക്ളെയിമുകൾ,വസ്തു ഇടപാടുകൾ തുടങ്ങിയ മേഖലകളിൽ പുതിയ നയങ്ങളും ചട്ടങ്ങളും പ്രാബല്യത്തിലാകും.

പുതുക്കിയ ആദായ നികുതി നിയമം പ്രാബല്യത്തിൽ

1961ലെ നിയമങ്ങൾക്ക് പകരം 2025ലെ ആദായ നികുതി ആക്‌ട് ഏപ്രിൽ ഒന്ന് മുതൽ നടപ്പാകും. സങ്കീർണതകൾ ഒഴിവാക്കി ആദായ നികുതി നിയമം ലളിതമാക്കി. പഴയ നിയമത്തിലെ സാമ്പത്തിക വർഷം, അസസ്‌മെന്റ് വർഷം, മുൻ വർഷം തുടങ്ങിയ ആശയക്കുഴപ്പമുണ്ടാക്കുന്ന വാക്കുകൾക്ക് പകരം നികുതി വർഷമാകും ഇനി മുതൽ ഉപയോഗിക്കുക. അടുത്ത നികുതി വർഷത്തിൽ 12 ലക്ഷം രൂപ വരെ വരുമാനമുള്ള വ്യക്തികൾക്ക് ആദായ നികുതി പൂജ്യമാകും. ശമ്പളക്കാർക്ക് സ്റ്റാൻഡേർഡ് ഡിഡക്ഷൻ അനുസരിച്ച് 75,000 രൂപ വരെയുള്ള വരുമാനത്തിന് നികുതി ഇളവ് ലഭിക്കും. അടുത്ത സാമ്പത്തിക വർഷത്തിൽ ആദായ നികുതി സ്ളാബുകളിലും റിട്ടേൺ സമർപ്പിക്കേണ്ട തിയതികളിലും മാറ്റം വരുത്തിയിട്ടില്ല. ഓഡിറ്റ് വേണ്ടാത്ത നികുതി ദായകർക്ക് റിട്ടേൺ സമർപ്പിക്കാനുള്ള കാലാവധി ആഗസ്റ്റ് 31 വരെ നീട്ടി. നികുതി നിയമങ്ങളുടെ എണ്ണം 399ൽ നിന്ന് 190ലേക്ക് കുറയും. നികുതി ഫോമുകളുടെ എണ്ണം 511ൽ നിന്ന് 333 ആകും.

പഴയ ടാക്സ് സ്‌കീമിന് അധിക ഇളവുകൾ

ഊണ് കൂപ്പണുകൾ

കമ്പനികൾ ജീവനക്കാർക്ക് നൽകുന്ന ഊണ് കൂപ്പണുകൾക്കുള്ള നികുതി ഇളവ് പരിധി 50 രൂപയിൽ നിന്ന് 200 രൂപയായി ഉയർത്തി.

ഗിഫ്‌റ്റ് കൂപ്പണുകൾ

ഓരോ വർഷവും 15,000 രൂപ വരെയുള്ള കോർപ്പറേറ്റ് ഗിഫ്‌റ്റ് കാർഡുകൾ, കൂപ്പണുകൾ, സർട്ടിഫിക്കറ്റുകൾ എന്നിവയ്ക്ക് ആദായ നികുതി ഇളവുകൾ ലഭിക്കും

കോർപ്പറേറ്റ് വായ്പകൾ

വിപണി നിരക്കിലും കുറഞ്ഞ പലിശയിലോ പലിശ രഹിതമായോ വാങ്ങുന്ന വായ്പകൾക്ക് എസ്.ബി.ഐയുടെ നിരക്കുമായുള്ള വ്യത്യാസം കണക്കിലെടുത്ത് നികുതി ഈടാക്കും. അതേസമയം രണ്ട് ലക്ഷം രൂപ വരെയുള്ള വായ്പകൾക്കും അടിയന്തര മെഡിക്കൽ സാഹചര്യങ്ങളിലെ വായ്പകൾക്കും ഇളവുണ്ട്.

കോർപ്പറേറ്റ് കമ്പനി വാഹനങ്ങൾ

തൊഴിൽദാതാവ് ജീവനക്കാരുടെ ഔദ്യോഗിക, വ്യക്തിഗത ആവശ്യങ്ങൾക്കായി നൽകുന്ന ചെറിയ വാഹനങ്ങൾക്ക് പ്രതിമാസം 8,000 രൂപയും വലിയ വാഹനങ്ങൾക്ക് 10,000 രൂപയും നികുതി ബാദ്ധ്യതയുണ്ടാകും. പുതിയ സ്കീമിലും ഈ നികുതി ബാധകമാണ്.

വീട്ടു വാടക അലവൻസ്

വീട്ടു വാടക അലവൻസായി 50 ശതമാനം നികുതി ഇളവ് ലഭ്യമാക്കുന്ന മെട്രോകളുടെ പട്ടികയിലേക്ക് നാല് നഗരങ്ങൾ കൂടി ഉൾപ്പെടുത്തി. ചെന്നൈ, ഡെൽഹി, കൊൽക്കത്ത, മുംബയ് എന്നിവയോടൊപ്പം ബംഗളൂരു, ഹൈദരാബാദ്, അഹമ്മദാബാദ്, പൂനെ എന്നീ നഗരങ്ങളിലും 50 ശതമാനം എച്ച്.ആർ. എ അലവൻസ് ലഭിക്കും

കുട്ടികളുടെ വിദ്യാഭ്യാസം

കുട്ടികളുടെ വിദ്യാഭ്യാസ ചെലവുകളിലെ നികുതി ഇളവ് പരിധി പ്രതിമാസം നൂറ് രൂപയിൽ നിന്ന് മൂവായിരം രൂപയായി ഉയർത്തി. ഹാേസ്‌റ്റൽ ചെലവ് ഇളവ് 300 രൂപയിൽ നിന്ന് 9,000 രൂപയായും ഉയർത്തി