പൊളിക്കുന്നതിനിടെ ബോട്ടി​ൽ തീപി​ടി​ത്തം, പരി​ക്കി​ല്ലാതെ തൊഴി​ലാളി​കൾ

​കൊല്ലം: കൊല്ലം കുരീപ്പുഴ പ്ലാവറ തീരത്ത് പൊളിക്കാൻ ഇട്ടിരുന്ന മത്സ്യബന്ധന ബോട്ടിന് തീപിടിച്ചു. ബോട്ടിലുണ്ടായിരുന്ന അഞ്ച് തൊഴിലാളികൾ അത്ഭുതകരമായി രക്ഷപ്പെട്ടു.

തിങ്കളാഴ്ച ഉച്ചയ്ക്ക് 12 മണിയോടെയാണ് സംഭവം. കുരീപ്പുഴ പ്ലാവറ ക്ഷേത്രത്തിന് സമീപമുള്ള വർക്ക് ഷോപ്പിനോട് ചേർന്നാണ് ബോട്ട് പൊളിക്കുന്ന ജോലികൾ നടന്നത്. ​ഗ്യാസ് കട്ടർ ഉപയോഗിച്ച് ബോട്ടിലെ കമ്പികൾ വെൽഡ് ചെയ്യുന്നതി​നി​ടെ ഡീസൽ ടാങ്കിലേക്ക് തീപ്പൊരി വീണതാണ് അപകടത്തിന് കാരണം. ടാങ്കിൽ തീ പടരുന്നത് ആദ്യഘട്ടത്തിൽ തൊഴിലാളികളുടെ ശ്രദ്ധയിൽപ്പെട്ടില്ല. നിമിഷങ്ങൾക്കുള്ളിൽ തീ ആളിപ്പടർന്നതോടെ അഞ്ചുപേരും പുറത്തേക്ക് ചാടി രക്ഷപ്പെടുകയായിരുന്നു. അപകടം നടന്ന ബോട്ടിന് സമീപം മറ്റ് ബോട്ടുകൾ ഉണ്ടായി​രുന്നെങ്കി​ലും തീ പടരുന്നത് കണ്ടയുടൻ അവ വേഗത്തിൽ മാറ്റിയതിനാൽ വലിയൊരു ദുരന്തം ഒഴിവായി.

​വിവരമറിഞ്ഞ് ചാമക്കട ഫയർ സ്റ്റേഷനിൽ നിന്ന് രണ്ട് യൂണിറ്റുകളും കൊല്ലം സ്റ്റേഷനിൽ നിന്ന് രണ്ട് യൂണിറ്റുകളും ഒരു ഫ്ലോട്ടിങ് യൂണിറ്റും സ്ഥലത്തെത്തി. ഏകദേശം ഒന്നര മണിക്കൂർ നീണ്ട തീവ്രശ്രമത്തിനൊടുവിലാണ് അഗ്നിരക്ഷാസേന തീ പൂർണ്ണമായും നിയന്ത്രണവിധേയമാക്കിയത്. അപകടത്തിൽ ബോട്ട് ഭാഗികമായി കത്തിനശിച്ചു. ഏകദേശം 7 ലക്ഷം രൂപയുടെ നഷ്ടം കണക്കാക്കുന്നു.