ബി.ഡെസ് പ്രവേശന പരീക്ഷയ്ക്ക് അപേക്ഷിക്കാം

സംസ്ഥാനത്തെ സർക്കാർ/സ്വാശ്രയ കോളേജുകളി ലേക്ക് 2026-27 അക്കാഡമിക് വർഷത്തെ ബാച്ലർ ഒഫ് ഡിസൈൻ (ബി.ഡെസ്) കോഴ്സിലേക്കുള്ള പ്രവേശന പരീക്ഷയ്ക്ക് (KS-DAT)അപേക്ഷിക്കാം.

എൽ.ബി.എസ് സെന്റർ ഫോർ സയൻസ് ആൻഡ് ടെക്നോളജി നടത്തുന്ന കേരള സ്റ്റേറ്റ് ഡിസൈൻ ആൻഡ് ആപ്റ്റിറ്റ്യൂഡ് ടെസ്റ്റ് സ്കോർ റാങ്ക്ലിസ്റ്റിന്റെ അടിസ്ഥാനത്തിൽ എ.ഐ.സി. ടി.ഇ അംഗീകാരമുള്ള സ്ഥാപനങ്ങളിലാണ് പ്രവേശനം.

എട്ട് സെമസ്റ്ററിലായി നാലുവർഷമാണ് പ്രോഗ്രാം. യോഗ്യത: 45 ശതമാനം മാർക്കോടെ കേരള ഹയർ സെക്കൻഡറി ബോർഡിന്റെ പ്ലസ്‌ടു പരീക്ഷ/തത്തുല്യ വിജയം. സംവരണവിഭാഗക്കാർക്ക് 40 ശതമാനം മതി.

ഒബ്ജക്ടിവ് ടൈപ്പ് മൾട്ടിപ്പിൾ ചോയ്സ് മാതൃകയിലുള്ള പരീക്ഷയാണ് കേരള സ്റ്റേറ്റ് ഡിസൈൻ ആൻഡ് ആപ്റ്റിറ്റ്യൂഡ് ടെസ്റ്റ് (KS-DAT).

വിഷയങ്ങൾ: സോഷ്യൽ ആൻഡ് ബേസിക് സയൻസസ് (പത്താം ക്ലാസ്)-സോഷ്യൽ സയൻസ്, വേൾഡ് ഹിസ്റ്ററി, ഇക്കണോമിക്സ‌്, വേൾഡ് ജ്യോഗ്രഫി, വേൾഡ് പൊളിറ്റിക്സ്), ബേസിക് സയൻസ് (ഫിസിക്‌സ്, കെമിസ്ട്രി, ബയോളജി) എന്നിവയിൽ പത്ത് ചോദ്യങ്ങളുണ്ടാകും

• ജനറൽ നോളജ്-കറന്റ് അഫയേഴ്‌സ്, എൻവയൺമെന്റ്, ഇന്ത്യൻ കൾച്ചർ, ഇൻവെൻഷൻസ്, സ്പോർട്സ്, ബുക്സ‌് എന്നിവയിൽനിന്നായി 20 ചോദ്യങ്ങൾ
• ഇംഗ്ലീഷ് ബേസിക് ഗ്രാമർ, കോംപ്രിഹെൻഷൻ 20 ചോദ്യങ്ങൾ
• ന്യൂമെറിക്കൽ എബിലിറ്റി ആൻഡ് അനലിറ്റിക്കൽ ആപ്റ്റിറ്റ്യൂഡ്-സ്‌പീഡ്, ഡിസ്റ്റൻസ്, റേഷ്യോ ആൻഡ് പ്രപ്പോർഷൻ, സിമ്പിൾ ഇന്ററസ്റ്റ് എന്നിവയിൽനിന്ന് 20 ചോദ്യങ്ങൾ
• അഭിരുചി മനസിലാക്കാൻ 30 ചോദ്യങ്ങൾ. ആകെ 100 ചോദ്യങ്ങൾ.

നെഗറ്റീവ് മാർക്കില്ല. ഒരുമണിക്കൂർ 40 മിനിറ്റാണ് പരീക്ഷാദൈർഘ്യം. പരീക്ഷാ തീയതിയും കേന്ദ്രവും പിന്നീട് അറിയിക്കും. വിശദ സിലബസ് സൈറ്റിലുണ്ട്.

സർക്കാർ-മാനേജ്മെന്റ്

സീറ്റുകൾ

കോളേജുകളിൽ സർക്കാർ സീറ്റും മാനേജ്‌മെന്റ് സീറ്റുമുണ്ട്. സർക്കാർ സീറ്റിലേക്ക് ആപ്റ്റിറ്റ്യൂഡ് ടെസ്റ്റിൽ യോഗ്യത നേടണം. കേന്ദ്രീകൃത അലോട്ട്മെന്റായിരിക്കും.

മാനേജ്മെന്റ് സീറ്റിലെ പ്രവേശനം അതത് സ്ഥാപനങ്ങൾ നടത്തും. KS-DAT സ്കോർ അല്ലെങ്കിൽ ദേശീയതലത്തിലുള്ള ഏതെങ്കിലും സ്കോർ വേണം (NATA, UCEED, NID-DAT, NIFT). വിശദവിവരങ്ങൾ വെബ്സൈറ്റിൽ.

അപേക്ഷാഫീസ്: 1300 രൂപ (ജനറൽ), 650 രൂപ (പട്ടികജാതി/ പട്ടികവർഗം). എൽ.ബി.എസ്. സെന്ററിന്റെ വെബ്‌സൈറ്റ് വഴി ഓൺലൈനായി ജൂൺ 4 വരെ അപേക്ഷാഫീസ് അടയ്ക്കാം. ഓൺലൈനായി അപേക്ഷിക്കാം. അവസാനതീയതി: ജൂൺ 5.

അപേക്ഷയുടെ പരിശോധനയ്ക്കുശേഷമുള്ള വിവരങ്ങൾ വെബ്സൈറ്റിൽ പ്രസിദ്ധീകരിക്കും. പരാതി നിശ്ചിതസമയത്തിനകം അറിയിക്കണം. റാങ്ക്‌ലിസ്റ്റിൽ ഉൾപ്പെടുന്നവർക്ക് കോളേജ് ഓപ്ഷനുകൾ രജിസ്റ്റർ ചെയ്യാൻ അവസരം ലഭിക്കും. വിവരങ്ങൾക്ക്: lbscentre. kerala.gov.in.