സി.ഇ.പി.എ: നേട്ടം കുറിച്ച് മലബാർ ഗോൾഡ്

 കരാറിലെ ആദ്യ ഗുണഭോക്താവ് മലബാർ ഗോൾഡ് ആൻഡ് ഡയമണ്ട്‌സ്

കോഴിക്കോട്: ഇന്ത്യ-യു.എ.ഇ സമഗ്ര സാമ്പത്തിക പങ്കാളിത്ത കരാറിന്റെ (സി.ഇ.പി.എ)​ ആദ്യ ഗുണഭോക്താവെന്ന പട്ടംചൂടി മലബാർ ഗോൾഡ് ആൻഡ് ഡയമണ്ട്‌സ്. കരാറിന്റെ ഭാഗമായി ഇന്ത്യയിൽ നിന്ന് യു.എ.ഇയിലേക്ക് നികുതിയിളവോടെ ആഭരണങ്ങൾ കയറ്റുമതി ചെയ്യാനുള്ള ആദ്യ അനുമതി മലബാർ ഗോൾഡിനാണ്.

ഇതിനുള്ള ഷിപ്പ്‌മെന്റ് സർട്ടിഫിക്കറ്റ് ഇന്ത്യയുടെ വാണിജ്യ സെക്രട്ടറി ബി.വി.ആർ.സുബ്രഹ്മണ്യൻ മലബാർ ഗോൾഡിന് കൈമാറി. ഇതുപ്രകാരം മലബാർ ഗോൾഡ് കയറ്റുമതി ചെയ്‌ത ആഭരണങ്ങൾ യു.എ.ഇയിലെത്തി.

സ്വർണം ഇറക്കുമതിക്കുള്ള അഞ്ചുശതമാനം നികുതിയാണ് കരാർ പ്രകാരം യു.എ.ഇ ഒഴിവാക്കിയത്. മലബാർ ഗോൾഡിന്റെ 'മെയ്ക്ക് ഇൻ ഇന്ത്യ - മാർക്കറ്റ് ടു ദ വേൾഡ്" ഉദ്യമത്തിന് കരുത്തേകുന്നതാണ് മേയ് ഒന്നിന് പ്രാബല്യത്തിൽ വന്ന സി.ഇ.പി.എ കരാറെന്ന് മലബാർ ഗ്രൂപ്പ് ചെയർമാൻ എം.പി.അഹമ്മദ് പറഞ്ഞു.