കോഴിക്കോടിനെ കാണണോ, കൊണ്ടുപോകാൻ ആനവണ്ടി റെഡി

കോഴിക്കോട്: ചരിത്രപ്രാധാന്യമുള്ള കോഴിക്കോട് നഗരത്തെ അടുത്തറിയാൻ ആനവണ്ടിയിൽ എഴുമണിക്കൂർ യാത്ര. ഒരാൾക്ക് ടിക്കറ്റ് ചാർജ് 200രൂപ. ഉച്ചയ്ക്ക് ഒരുമണിക്ക് കോഴിക്കോട് കെ.എസ്.ആർ.ടി.സി സ്റ്റാൻഡിൽ നിന്നും ആരംഭിക്കുന്ന യാത്ര രാത്രി എട്ടുമണിക്ക് അവസാനിക്കും. 'കോഴിക്കോടിനെ അറിയാൻ സാമൂതിരിയുടെ നാട്ടിലൂടെ ഒരു യാത്ര' എന്ന പേരിൽ ആരംഭിച്ച ബസ് സർവീസ് ജില്ലാ കളക്ടർ ഡോ.എൻ തേജ് ലോഹിത് റെഡ്ഢി ഫ്‌ളാഗ് ഓഫ് ചെയ്തു.

ചരിത്ര സ്ഥലങ്ങൾ സന്ദർശിക്കാൻ അവസരം ഒരുക്കുന്നതിലൂടെ വിദ്യാർത്ഥികളുടെ അറിവ് വർധിപ്പിക്കാനാകുമെന്ന് കലക്ടർ അഭിപ്രായപ്പെട്ടു . മലബാറിനെ സംബന്ധിച്ചിടത്തോളം വളരെയധികം ചരിത്ര പ്രാധാന്യമുള്ള നഗരമാണ് കോഴിക്കോട്. കാപ്പാട് പോലെയുള്ള ടൂറിസം കേന്ദ്രങ്ങളിലും ഇത്തരം ബസ് സർവീസുകൾ നടത്തിയാൽ കൂടുതൽ ഉചിതമായിരിക്കുമെന്നും കൂടുതൽ തൊഴിലവസരങ്ങൾ സൃഷ്ടിക്കാൻ ഇതിലൂടെ സാധിക്കുമെന്നും കളക്ടർ പറഞ്ഞു. ചരിത്ര പ്രാധാന്യമുള്ള സ്ഥലങ്ങൾ സന്ദർശിക്കാൻ അവസരം ഒരുക്കിയ കെ.എസ്.ആർ.ടി.സിയെ കളക്ടർ അഭിനന്ദിച്ചു. വിദ്യാർത്ഥികൾക്കൊപ്പം ജില്ലാ കളക്ടറും ആനവണ്ടിയിൽ നഗരംചുറ്റി.

കെ.എസ്.ആർ.ടി.സി ടിക്കറ്റിതര വരുമാനം വർദ്ധിപ്പിക്കുന്നതിന്റെ ഭാഗമായി സംസ്ഥാനത്തുടനീളം നടപ്പാക്കുന്ന ടൂർ പാക്കേജിന്റെ ഭാഗമാണ് 'നഗരം ചുറ്റാം ആനവണ്ടിയിൽ' എന്ന യാത്ര. ബഡ്ജറ്റ് ടൂറിസം സെല്ലുമായി കൈകോർത്ത് 200 ഓളം ട്രിപ്പുകളാണ് കോഴിക്കോട് ജില്ലയിൽ നടത്തുക. കെ.എസ്.ആർ.ടി.സി ബസ് സ്റ്രാൻഡിൽ നിന്ന് യാത്ര ആരംഭിക്കുന്ന ബസ് പ്ലാനറ്റോറിയം, തളി ക്ഷേത്രം, കുറ്റിച്ചിറ മിശ്കാൽ പള്ളി, കുറ്റിച്ചിറ കുളം, കോതി ബീച്ച്, നൈനാംവളപ്പ്, സൗത്ത് ബീച്ച്, ഗാന്ധി പാർക്ക്, ഭട്ട് റോഡ് ബീച്ച്, ഇംഗ്ലീഷ് പള്ളി, മാനാഞ്ചിറ സ്‌ക്വയർ എന്നിവ വഴിയാണ് കടന്നുപോകുന്നത്.

ജില്ലാ ട്രാൻസ്‌പോർട്ട് ഓഫീസർ കെ.യൂസഫ് , കെ.എസ്.ആർ.ടി.സി ജില്ലാ ഓഫീസർ പി.കെ പ്രശോഭ്, നൊച്ചാട് ഹയർ സെക്കൻഡറി സ്‌കൂൾ പ്രധാനദ്ധ്യാപകൻ അബ്ദുറഹിമാൻ, ഉദ്യോഗസ്ഥർ, കെ.എസ്.ആർ.ടി.സി അംഗീകൃത ട്രേഡ് യൂണിയൻ പ്രതിനിധികൾ തുടങ്ങിയവർ പങ്കെടുത്തു. ബി.ടി.സി ജില്ലാ കോർഡിനേറ്റർ പി.കെ ബിന്ദു സ്വാഗതവും ബി എം എസ് നോർത്ത് സോൺ കോർഡിനേറ്റർ ബിനു. ഇ.എസ് നന്ദിയും പറഞ്ഞു.

എല്ലാദിവസവും യാത്ര,

ഒരാൾക്ക് 200

ചരിത്രപരമായ പ്രദേശങ്ങൾ ഉൾക്കൊള്ളിച്ചുകൊണ്ട് കോഴിക്കോടിനെ പരിചയപ്പെടുക എന്നതാണ് യാത്രയുടെ ഉദ്ദേശം. ദിവസവും ഒരു ബസ് സർവീസാണുണ്ടാവുക. 200 രൂപയായിരിക്കും ചാർജ്. ഉച്ചയ്ക്ക് ഒരു മണി മുതൽ രാത്രി 8 വരെ നഗരം ചുറ്റി കാണാം. 30 മുതൽ 80 വയസ് വരെയുള്ളവർ പങ്കെടുത്തുകൊണ്ടാണ് നാളത്തെ യാത്ര. 'കോഴിക്കോടിനെ അറിയാൻ സാമൂതിരിയുടെ നാട്ടിലൂടെ ഒരു യാത്ര'യിൽ പോകാൻ ആഗ്രഹിക്കുന്നവർ 9846100728, 9544477954 എന്നീ നമ്പറുകളിൽ വിളിച്ച് ബുക്ക് ചെയ്യാം.