പൃഥ്വിരാജിനെ നായകനാക്കി നവാഗതനായ ജയൻ നമ്പ്യാർ സംവിധാനം ചെയ്യുന്ന വിലായത്ത് ബുദ്ധയുടെ തുടർചിത്രീകരണം ജൂൺ 10ന് മറയൂരിൽ ആരംഭിക്കും. ഒരു മാസത്തെ ചിത്രീകരണമാണ് പ്ളാൻ ചെയ്യുന്നത്. ഇതോടെ ചിത്രീകരണം പൂർത്തിയാകും. ബോളിവുഡ് താരം കജോൾ നിർമ്മിക്കുന്ന അക്ഷയ്‌കുമാർ, ടൈഗർ ഷെറഫ് ചിത്രം ബഡാ മിയാൻ ഛോട്ടെ മിയാനിൽ തന്റെ ഭാഗങ്ങൾ പൂർത്തിയാക്കിയ ശേഷമാണ് വിലായത്ത് ബുദ്ധയിലെ ഡബിൾ മോഹനാവാൻ പൃഥ്വിരാജ് വീണ്ടും എത്തുന്നത്. കഴിഞ്ഞ ഒക്ടോബറിൽ മറയൂരിൽ തന്നെ ആയിരുന്നു വിലായത്ത് ബുദ്ധയുടെ ആദ്യ ഷെഡ്യൂൾ. പൃഥ്വിരാജിനൊപ്പം നിറഞ്ഞുനില്ക്കുന്ന തൂവെള്ള ഭാസ്കരൻ എന്ന കഥാപാത്രത്തെ കോട്ടയം രമേശ് അവതരിപ്പിക്കുന്നു. പകയും പ്രതികാരവും പ്രണയവും പശ്ചാത്തലമാകുന്ന ത്രില്ലർ മൂവി എന്നു വിശേഷിപ്പിക്കാവുന്ന വിലായത്ത് ബുദ്ധയിൽ പ്രിയംവദ കൃഷ്ണൻ ആണ് നായിക. ഷമ്മി തിലകൻ, അനുമോഹൻ, രാജശ്രീ നായർ, ടി.ജെ. അരുണാചലം തുടങ്ങിയവരാണ് മറ്റു താരങ്ങൾ. ജി.ആർ. ഇന്ദുഗോപന്റെ പ്രശസ്ത നോവലായ വിലായത്ത് ബുദ്ധ ഇതേ പേരിൽ ചലച്ചിത്രമാവുകയാണ്. ഇന്ദുഗോപനും രാജേഷ് പിന്നാടനും ചേർന്നാണ് രചന. അരവിന്ദ് കശ്യപ് ഛായാഗ്രഹണം നിർവഹിക്കുന്നു. ഉർവശി തിയേറ്റേഴ്സിന്റെ ബാനറിൽ സന്ദീപ് സേനൻ ആണ് നിർമ്മാണം.