സുന്ദരേശ്വരക്ഷേത്രത്തിൽ നിന്നുള്ള ദിവ്യജ്യോതി ശിവഗിരിയിലെത്തി

ശിവഗിരി:ഡിസംബർ 26ന് കണ്ണൂർ സുന്ദരേശ്വര ക്ഷേത്രത്തിൽ നിന്ന് കടന്നപ്പള്ളി രാമചന്ദ്രൻ എം.എൽ.എ
ഉദ്ഘാടനം ചെയ്ത ദിവ്യജ്യോതി ശിവഗിരിയിൽ എത്തിച്ചേർന്നു. ഇന്നലെ കാലത്ത് ചേർത്തല കരുവാറ്റ
കന്നുകാലിപ്പാലം ഗുരുമന്ദിരത്തിൽ നിന്നും ആരംഭിച്ച് ഗുരുമന്ദിരം സെക്രട്ടറി കുഞ്ഞുമോന്റെ നേതൃത്വത്തിൽ സ്വീകരണം ഏറ്റു വാങ്ങിയ ദിവ്യജ്യോതി പ്രയാണയാത്ര കായംകുളം, ഓച്ചിറ കരുനാഗപ്പള്ളി ഗുരുധർമ്മ പ്രചാരണ സഭ , വെറ്റമുക്ക്, ചവറ, നീങ്ങകം, ശക്തികുളങ്ങര, കൊട്ടിയം, ചാത്തന്നൂർ,പാരിപ്പള്ളി എന്നിവിടങ്ങളിലുള്ള സ്വീകരണങ്ങൾ ഏറ്റുവാങ്ങികൊണ്ടാണ് ശിവഗിരിയിൽ എത്തിചേർന്നത്.

തുടർന്ന് ശ്രീ ഭക്തിസംവർദ്ധിനി യോഗം പ്രസിഡന്റ് കെ.പി. ബാലകൃഷ്ണൻ,വൈസ് പ്രസിഡന്റ് ടി.കെ. രാജേന്ദ്രൻ,
അസിസ്റ്റന്റ് സെക്രട്ടറി കെ. പി. വിനോദ് കുമാർ, ഡയറക്ടർമാരായ പി.സി അശോകൻ, സി സി മോഹനൻ എന്നിവരോടൊപ്പം ജാഥാ അംഗങ്ങളായ ഗുരുധർമ്മ പ്രചരണസഭ കണ്ണൂർ ജില്ലാ ജോയിന്റ് സെക്രട്ടറി ആർട്ടിസ്റ്റ്
ശശികല, എസ്.എൻ.ഡി.പി പയ്യന്നൂർ യൂണിയൻ വൈസ് ചെയർമാൻ എം.കെ.രാജീവൻ , ഗുരുധർമ്മ പ്രചരണ സഭ കോഴിക്കോട് ജില്ലാ സെക്രട്ടറി പി.പി. രാമനാഥൻ എന്നിവരും ചേർന്ന് ദിവ്യജ്യോതി കൈമാറി.

തുടർന്ന് തീർത്ഥാടന സമ്മേളന നഗരിയിൽ ദിവ്യജ്യോതി തെളിയിക്കുന്നതോടൊപ്പം ഈ വർഷത്ത ശിവഗിരി തീർത്ഥാടന സമ്മേളനങ്ങൾക്കും തുടക്കമായി.വഴി നീളെ പതിനായിരകണക്കിന് ശ്രീനാരായണീയ ഭക്തർ
ദിവ്യജ്യോതി പ്രയാണത്തിൽ പങ്കാളികളായി.