സേവനം യു.കെ ഗുരുദേവ ജയന്തി ആഘോഷം

കോട്ടയം : ശ്രീനാരായണ ഗുരു ദർശനം ലോകത്തെ അറിയിക്കാൻ ഓരോ മലയാളിയും പ്രതിജ്ഞാബദ്ധരാകണമെന്ന് കേംബ്രിഡ്‌ജ് മേയർ അഡ്വ.ബൈജു തിട്ടാല പറഞ്ഞു. സേവനം യു.കെയുടെ നേതൃത്വത്തിൽ യു.കെയിലെ ശിവഗിരി ആശ്രമത്തിൽ നടന്ന ശ്രീനാരായണ ഗുരുദേവ ജയന്തി ആഘോഷം ഉദ്ഘാടനം ചെയ്യുകയായിരുന്നു അദ്ദേഹം.

സേവനം യു.കെ ചെയർമാൻ ബൈജു പാലയ്ക്കൽ അദ്ധ്യക്ഷത വഹിച്ചു. ശാസ്ത്രജ്ഞനും കോട്ടയം ഗുരുനാരായണ സേവനികേതൻ ട്രസ്റ്റിയുമായ സി.എ.ശിവരാമൻ മുഖ്യപ്രഭാഷണം നടത്തി. യൂണിവേഴ്‌സിറ്റി ഒഫ് ലണ്ടൻ റിട്ട. പ്രൊഫ. അലക്‌സ് ഗ്യാത്, എസ്.എൻ.ഡി.പി യോഗം ഇൻസ്‌പെക്ടിംഗ് ഓഫീസർ രവീന്ദ്രൻ എസ്.എഴുമറ്റൂർ, യോഗം ചാലക്കുടി ഖന്നനഗർ ശാഖാ പ്രസിഡന്റ് സുന്ദർലാൽ, ശിവഗിരി ആശ്രമം മാനേജിംഗ് ട്രസ്റ്റി ഡോ. ബിജു പെരിങ്ങത്തറ, സേവനം യു.കെ കുടുംബ യൂണിറ്റ് കൺവീനർ ഗണേഷ് ശിവൻ തുടങ്ങിയവർ പങ്കെടുത്തു. മികച്ച വിജയം നേടിയ വിദ്യാർത്ഥികളെയും, ശിവഗിരി ആശ്രമം യു.കെയുടെ പ്രവർത്തനങ്ങളിൽ സമഗ്ര സംഭാവന നൽകിയ ദിനേശ് കക്കലാക്കുടിലിൽ, അനീഷ് അശോകൻ തുടങ്ങിയവരെയും ആദരിച്ചു. സജീഷ് ദാമോദരൻ സ്വാഗതവും കല ജയൻ നന്ദിയും പറഞ്ഞു.