ഡി.എം.കെ എം.പിക്ക് 908 കോടി പിഴ

ന്യൂഡൽഹി: വ്യവസായിയും ഡി.എം.കെ ലോക്‌സഭാ എം.പിയുമായ എസ്. ജഗത്‌രക്ഷകനും കുടുംബത്തിനും 908 കോടി രൂപ പിഴയിട്ട് ഇ.ഡി അജ്യുഡിക്കേഷൻ അതോറിട്ടി. വിദേശ വിനിമയ മാനേജ്‌മെന്റ് നിയമം (ഫെമ)​ പ്രകാരം ജഗത്‌രക്ഷകനും കുടുംബത്തിനുമെതിരെ 2020ൽ ഇ.ഡി അന്വേഷണം ആരംഭിച്ചിരുന്നു. 89.19 കോടിയുടെ സ്വത്തുവകകളും പിടിച്ചെടുത്തു. ഫെമ ലംഘിച്ച് വിദേശ ഓഹരികൾ വാങ്ങി കൂട്ടിയെന്നും,​ സിംഗപ്പൂരിലെ ഷെൽ കമ്പനിയിൽ 42 കോടിയുടെ നിക്ഷേപം നടത്തിയെന്നും ഇ.ഡി കണ്ടെത്തി. ശ്രീലങ്കൻ കമ്പനിയിൽ 9 കോടിയും നിക്ഷേപിച്ചുവെന്ന് ഇ.ഡി പറയുന്നു. ആരോപണങ്ങൾ തെളിയിക്കാൻ സാധിച്ചതോടെ,​ ഇ.ഡിയുടെ അജ്യുഡിക്കേഷൻ അതോറിട്ടി 908 കോടി രൂപ പിഴയിടാൻ തീരുമാനിച്ചുവെന്ന് ഇ.ഡി വ്യക്തമാക്കി. പിടിച്ചെടുത്ത സ്വത്തുവകകൾക്ക് കള്ളപ്പണ ഇടപാടുമായി ബന്ധമുണ്ടോയെന്ന് പരിശോധിക്കാനാണ് ഇ.ഡി അജ്യുഡിക്കേഷൻ അതോറിട്ടി.