ജാർഖണ്ഡിൽ സുരക്ഷാസേനയുമായി ഏറ്റുമുട്ടൽ; തലയ്ക്ക് പത്ത് ലക്ഷം രൂപ വിലയിട്ട മാവോയിസ്റ്റ് നേതാവിനെ വധിച്ചു

റാഞ്ചി: ജാർഖണ്ഡിലെ ലത്തേഹാറിൽ വച്ചുണ്ടായ ഏ​റ്റുമുട്ടലിൽ മാവോയിസ്​റ്റ് നേതാവിനെ വധിച്ച് സുരക്ഷാസേന. സർക്കാർ പത്ത് ലക്ഷം രൂപ പാരിതോഷികം പ്രഖ്യാപിച്ചിരുന്ന പപ്പു ലോഹറ എന്ന മാവോയിസ്റ്റ് നേതാവാണ് കൊല്ലപ്പെട്ടത്. ഇയാൾ ജാർഖണ്ഡ് ജൻ മുക്തി പരിഷത്ത് എന്ന വിമത മാവോയിസ്​റ്റ് സംഘടനയുടെ നേതാവായിരുന്നു. ഏറ്റുമുട്ടലിൽ ഇയാൾക്കൊപ്പം സർക്കാർ അഞ്ച് ലക്ഷം രൂപ പാരിതോഷികം പ്രഖ്യാപിച്ചിരുന്ന സഹായി, പ്രഭാത് ഗഞ്ചുവും കൊല്ലപ്പെട്ടു. ഇവരോടൊപ്പമുണ്ടായിരുന്ന മൂന്നാമനെ സുരക്ഷാസേന അറസ്​റ്റ് ചെയ്തു. ഇയാളിൽ നിന്ന് ഇൻസാസ് റൈഫിൾ കണ്ടെടുത്തതായാണ് വിവരം.

ഛത്തീസ്ഗഡിലെ നാരായൺപൂരിലെ മാവോയിസ്​റ്റ് നേതാവായ നമ്പാല കേശവ് റാവു എന്ന ബസവരാജുവിനെ വധിച്ച് മൂന്ന് ദിവസങ്ങൾക്കുശേഷമാണ് ഏ​റ്റുമുട്ടൽ നടന്നത്. നാരായൺപൂർ- ബിജാപൂർ അതിർത്തിയിൽ 50 മണിക്കൂറോളം നീണ്ടുനിന്ന വെടിവയ്പ്പിലിനൊടുവിലാണ് ബസവരാജു കൊല്ലപ്പെട്ടത്. ഏ​റ്റുമുട്ടലിൽ 27 മാവോയിസ്​റ്റുകൾ കൊല്ലപ്പെട്ടിരുന്നു. കേന്ദ്ര സൈനിക കമ്മീഷന്റെ തലവനായിരുന്ന ബസവരാജു പിന്നീട് മാവോയിസ്​റ്റ് സംഘടനയുടെ ഭാഗമാകുകയായിരുന്നു. തലയ്ക്ക് ഒന്നരക്കോടി പാരിതോഷികം പ്രഖ്യാപിച്ചിരുന്ന ബസവരാജുവിനായി ദേശീയ അന്വേഷണ ഏജൻസിയും തെലങ്കാന, ആന്ധ്രാപ്രദേശ് പൊലീസും സംയുക്തമായി തിരച്ചിൽ നടത്തിയിരുന്നു.

ഇന്നലെ മഹാരാഷ്ട്രയിൽ പൊലീസും സി.ആർ.പി.എഫും ചേർന്ന് നടത്തിയ ഓപ്പറേഷനിടയിൽ നാല് മാവോയിസ്റ്റുകളെ വധിച്ചു. മഹാരാഷ്ട്ര -ഛത്തീസ്ഗഢ് അതിർത്തിക്ക് സമീപം ഗഡ്ചിരോളിയിലാണ് ഏറ്റുമുട്ടലുണ്ടായത്. 12 സി 60 കമാൻഡോ സംഘവും ഒരു സി.ആർ.പി എഫ് യൂണിറ്റും ഉൾപ്പെടെ 300 ഓളം പേരാണ് ഓപ്പറേഷനിലുണ്ടായിരുന്നത്.