സൗദിയിൽ വിസകൾക്ക് ഇനി ഏകീകൃത നിരക്ക് ,​ എല്ലാവിസകൾക്കും ഇനി മുതൽ ഫീസ് 300 റിയാൽ

ജിദ്ദ: സൗദിയിൽ എല്ലാതരം വിസകൾക്കും ഏകീകൃത ഫീസ് ഏർപ്പെടുത്താൻ തീരുമാനം. എല്ലാതരം വിസകൾക്കും 300 റിയാൽ ഫീസ് ഏർപ്പെടുത്താനാണ് തീരുമാനിച്ചിരിക്കുന്നത്. ഒരു വർഷം കാലാവധിയുള്ള മൾട്ടിപ്പിൾ റീ എൻട്രി വിസയടക്കം ഹജ്ജ്, ഉംറ, ടൂറിസ്​റ്റ്, ബിസിനസ്, വിസി​റ്റ്, ട്രാൻസി​റ്റ്, മൾപ്പിൾ എൻട്രി വിസകൾക്കെല്ലാം ഇനി ഏകീകൃത ഫീസ് ആയിരിക്കും.

കഴിഞ്ഞ ദിവസമാണ് വിസ ഫീസ് ഏകീകരിക്കാൻ തീരുമാനമായത്. ഇതിന്റെ ഭാഗമാണ് ഉംറ സ്​റ്റാമ്പിംഗ് ഫീസ് 50ൽ നിന്ന് 300 റിയാൽ ആക്കിയത്.

സിംഗിൾ എൻട്രി വിസയുടെ കാലാവധി ഒരു മാസമാണ്. ഒരു വർഷം കാലാവധിയുള്ള മൾട്ടിപ്പിൾ എൻട്രി വിസയിൽ മൂന്ന് മാസം വരെ തങ്ങാം. ട്രാൻസി​റ്റ് വിസ കാലാവധി 96 മണിക്കൂറാണ്. അതേസമയം ആവർത്തിച്ചുള്ള ഉംറയ്ക്ക് ഏർപ്പെടുത്തിയിരുന്ന 2000 റിയാൽ അധിക ഫീസ് എടുത്തു കളഞ്ഞു.