പ്രവാസികളുടെ പണി മുടങ്ങിയേക്കാം; യുഎഇയിൽ റെഡ് അലർട്ട്, പുറത്തിറങ്ങുന്നവർ കരുതിയിരിക്കണം

അബുദാബി: ഇന്ന് യുഎഇയിൽ കാലാവസ്ഥയിൽ വലിയ മാറ്റമുണ്ടാകുമെന്ന് കാലാവസ്ഥാ വകുപ്പിന്റെ മുന്നറിയിപ്പ്. താപനില വലിയ രീതിയിൽ ഉയരും. ഇരുണ്ട കാർമേഘങ്ങൾ വ്യാപകമായി കാണപ്പെടും. കാർമേഘങ്ങൾ കിഴക്ക് ദിശയിലേക്കായിരിക്കും സ‌ഞ്ചരിക്കുകയെന്നും കാലാവസ്ഥാ വകുപ്പ് അറിയിച്ചു.

ഇന്ന് രാത്രിയോടെയും നാളെ രാവിലെയും ചില തീരപ്രദേശങ്ങളിൽ കാലാവസ്ഥ ഈർപ്പമുള്ളതാകുമെന്നും കാലാവസ്ഥാ വകുപ്പ് വ്യക്തമാക്കി. യുഎഇയുടെ തലസ്ഥാനമായ അബുദാബിയിലെ പല ഭാഗങ്ങളിലും മൂടൽമഞ്ഞ് കണക്കിലെടുത്ത് റെഡ്, യെല്ലോ അലർട്ടുകൾ പുറപ്പെടുവിച്ചിട്ടുണ്ട്. തെക്കുകിഴക്ക് മുതൽ വടക്കുകിഴക്ക് ദിശയിൽ നിന്ന് നേരിയ കാറ്റ് ഉണ്ടാകുമെന്നും കാലാവസ്ഥാ വകുപ്പ് അറിയിച്ചു. മണിക്കൂറിൽ 10 കിലോമീറ്റ‌ർ മുതൽ 20 കിലോമീറ്റ‌ർവരെ വേഗതയിലായിരിക്കും കാറ്റ് വീശുക. ഇത് മണിക്കൂറിൽ 30 കിലോമീറ്റ‌ർ വരെ വേഗതയിൽ ഉയരാനിടയുണ്ടെന്നും കാലാവസ്ഥാ വകുപ്പ് ചൂണ്ടിക്കാട്ടി.

അറേബ്യൻ ഗൾഫിലും ഒമാൻ കടലിലും കാലാവസ്ഥ ഭേദപ്പെട്ടതായിരിക്കും. രാജ്യത്തുടനീളം ചൂടുള്ള കാലാവസ്ഥയായിരിക്കുമെങ്കിലും അബുദാബിയിൽ പരമാവധി താപനില 42 ഡിഗ്രി സെൽഷ്യസും കുറഞ്ഞത് 31 ഡിഗ്രി സെൽഷ്യസും ആയിരിക്കും. ദുബായിൽ പരമാവധി താപനില 44 ഡിഗ്രി സെൽഷ്യസും കുറഞ്ഞത് 33 ഡിഗ്രി സെൽഷ്യസും ആയിരിക്കും, അയൽ നഗരമായ ഷാർജയിലും സമാനമായി 44 ഡിഗ്രി സെൽഷ്യസും കുറഞ്ഞത് 33 ഡിഗ്രി സെൽഷ്യസും ആയിരിക്കും താപനില എന്നാണ് കാലാവസ്ഥാ വകുപ്പ് വ്യക്തമാക്കുന്നത്.