അരുന്ധതിയുടെ അടക്കം 25 പുസ്തകങ്ങൾ കാശ്മീരിൽ നിരോധിച്ചു

ശ്രീനഗർ: 'തെറ്റായ വിവരങ്ങളും വിഘടനവാദവും പ്രചരിപ്പിക്കുന്നു " എന്ന് ആരോപിച്ച് അരുന്ധതി റോയ്,എ.ജി.നൂറാനി എന്നിവരുടേത് ഉൾപ്പെടെ 25 പുസ്തകങ്ങൾ നിരോധനം ഏർപ്പെടുത്തി ജമ്മു കാശ്മീർ ലഫ്റ്റനന്റ് ഗവർണർ. പുസ്തകങ്ങൾ കണ്ടുകെട്ടാനും ഉത്തരവിട്ടു. രഹസ്യാന്വേഷണ വിവരങ്ങളുടെയും അന്വേഷണത്തിന്റെയും അടിസ്ഥാനത്തിലാണ് പുസ്തകങ്ങൾ നിരോധിച്ചതെന്ന് സംസ്ഥാന ആഭ്യന്തര സെക്രട്ടറി പുറത്തിറക്കിയ ഉത്തരവിൽ പറയുന്നു. എ.ജി.നൂറാനി,അരുന്ധതി റോയ്,വിക്ടോറിയ ഷോഫീൽഡ്,സുമന്ത്ര ബോസ്,ക്രിസ്റ്റഫർ സ്നെഡൻ എന്നിവരാണ് നിരോധിക്കപ്പെട്ട പുസ്തകങ്ങളുടെ രചയിതാക്കളിൽ ചിലർ. ഭാരതീയ നാഗരിക് സുരക്ഷാ സംഹിതയിലെ 98 വകുപ്പ് പ്രകാരമാണ് പുസ്തകങ്ങൾ നിരോധിച്ചത്.‌

അരുന്ധതിയുടെ 'ആസാദി" എന്ന പുസ്തകമാണ് നിരോധിച്ചത്. ഇന്ത്യയിലെ ഭരണഘടനാ വിദഗ്ദ്ധനായിരുന്ന നൂറാനി കാശ്മീരിനെക്കുറിച്ചും ഇന്ത്യൻ യൂണിയനുമായുള്ള ഭരണഘടനാപരമായ ബന്ധത്തെക്കുറിച്ചും എഴുതിയ 'ദി കാശ്മീർ ഡിസ്പ്യൂട്ട് 1947-2012" എന്ന പുസ്തകമാണ് നിരോധിക്കുകയും കണ്ടുകെട്ടുകയും ചെയ്തത്. ബ്രിട്ടീഷ് എഴുത്തുകാരിയും ചരിത്രകാരിയുമായ വിക്ടോറിയ ഷോഫീൽഡിന്റെ ‘കാശ്മീർ ഇൻ കോൺഫ്ലിക്റ്റ്-ഇന്ത്യ, പാകിസ്ഥാൻ ആൻഡ് ദി അൺഎൻഡിംഗ് വാർ " എന്ന പുസ്തകമാണ് നിരോധിച്ചത്.

ലണ്ടൻ സ്കൂൾ ഒഫ് ഇക്കണോമിക്സിലെ പ്രൊഫസറായ സുമന്ത്ര ബോസ് എഴുതിയ 'കോൺടസ്റ്റഡ് ലാൻഡ്സ് ",'കശ്മീർ അറ്റ് ദി ക്രോസ്റോഡ്സ്" എന്നീ പുസ്തകങ്ങളും നിരോധിച്ചു.