ജർമ്മൻ യുവാവ് അബദ്ധത്തിൽ വാങ്ങിയത് 28 ടെസ്‌ല കാറുകൾ!

ബെർലിൻ: ജർമ്മൻ യുവാവ് അബദ്ധത്തിൽ വാങ്ങിയത് 28 ടെസ്‌ല മോഡൽ 3 കാറുകൾ. കൈയിൽ കിട്ടിയ ബിൽ തുക 14 ലക്ഷം യൂറോയും! ഏകദേശം 12 കോടി രൂപ. ടെസ്‌ലയുടെ വെബ്‌സൈറ്റിനുണ്ടായ തകരാറാണ് കെണിയായത്. ഓട്ടോപൈലറ്രോടു കൂടിയ ടെസ്‌ല മോഡൽ 3 വാങ്ങാനാണ് യുവാവും അച്‌ഛനും വെബ്‌സൈറ്റ് സന്ദർശിച്ചത്. ആവശ്യമായ വിവരങ്ങളെല്ലാം നൽകിയ ശേഷം പേമെന്റ് 'കൺഫേം" ചെയ്യാനുള്ള ബട്ടൺ അമർത്തിയപ്പോൾ 'എറർ" കാണിച്ചു.

തുടർന്ന്,​ 27 തവണകൂടി അവർ ബട്ടൺ അമർത്തി. ഇതോടെയാണ് 28 കാറുകൾ ബുക്ക് ചെയ്യപ്പെട്ടത്. അല്പം കഴിഞ്ഞ്,​ 28 കാറുകൾ ബുക്ക് ചെയ്‌തെന്ന അറിയിപ്പോടു കൂടി ബിൽ ലഭിക്കുകയായിരുന്നു. നികുതി ഉൾപ്പെടെ ഏകദേശം 50,​000 യൂറോയാണ് (ഏകദേശം 45.50 ലക്ഷം രൂപ)​ ടെസ്‌ല മോഡൽ 3ന് ബെർലിനിൽ വില. അസ്വാഭാവിക ഓർഡർ കണ്ട്,​ അന്വേഷിച്ച ടെസ്‌ല,​ വെബ്‌സൈറ്ര് തകരാർ പരിഹരിക്കുകയും യുവാവിനോട് വീണ്ടും ഓർഡർ ചെയ്യാൻ നിർദേശിക്കുകയും ചെയ്‌തു. റോഡ് സിഗ്‌നലുകൾ തിരിച്ചറിഞ്ഞ്,​ സ്വയം ഡ്രൈവ് ചെയ്യുന്ന സംവിധാനമാണ് ഓട്ടോപൈലറ്ര്. 2019 മുതൽ എല്ലാ പുതിയ ടെസ്‌ല കാറുകളിലും ഈ ഫീച്ചർ സ്‌റ്റാൻഡേർഡ് ആയുണ്ട്. 6,​000 മുതൽ 8,​000 ഡോളർ വരെയാണ് ഓട്ടോപൈലറ്ര് ഫീച്ചറിന് ടെസ്‌ല ഈടാക്കുന്നത്.