തിരുവനന്തപുരം: വിജിലന്സ് കേസുകള് വേഗത്തില് തീര്പ്പാക്കുന്നതിന് സംസ്ഥാനത്ത് കൂടുതല് വിജിലന്സ് കോടതികള് അനുവദിക്കും. ഇതിനായുള്ള നടപടി സ്വീകരിക്കാൻ വിജിലന്സ് പ്രവര്ത്തനങ്ങള് വിലയിരുത്തുന്നതിന് മുഖ്യമന്ത്രി പിണറായി വിജയന്റെ അദ്ധ്യക്ഷതയില് ചേര്ന്ന യോഗത്തിൽ തീരുമാനമായി.
ആഭ്യന്തര വിജിലന്സ് ഉദ്യോഗസ്ഥര് മൂന്നുമാസം കൂടുമ്പോള് അവരുടെ പ്രവര്ത്തന അവലോകന റിപ്പോര്ട്ടുകള് വിജിലന്സ് ഡയറക്ടര്ക്ക് സമര്പ്പിക്കണമെന്നും യോഗത്തിൽ അറിയിച്ചു. കൂടാതെ മൂന്ന് മാസത്തിലൊരിക്കല് അവരുടെ വിശകലന യോഗം വിജിലന്സ് ഡയറക്ടറേറ്റില് നടത്തും. അതോടൊപ്പം വിവിധ വകുപ്പുകളുടെ ആഭ്യന്തര വിജിലൻസ് ഓഫീസർമാര്ക്കും പരിശീലനം നൽകും. ആഭ്യന്തര വിജിലൻസ് സെല്ലില് ഓഫീസർമാരെ നിയമിക്കുന്നതിന് മുമ്പ് രഹസ്യാന്വേഷണം നടത്തി റിപ്പോർട്ട് വാങ്ങും.
കേസുകള്ക്കും അന്വേഷണങ്ങള്ക്കും സമയപരിധിയുണ്ടായിരിക്കും. കൂടുതല് സമയം ആവശ്യമായാല് ഡയറക്ടറുടെ അനുമതി വാങ്ങണം. കോടതി വെറുതെ വിടുന്ന കേസുകളില് സമയബന്ധിതമായി അപ്പീല് ഫയല് ചെയ്യണം. രണ്ട് മാസത്തിനുള്ളില് അപ്പീല് ഫയല് ചെയ്തെന്ന് ഉറപ്പാക്കണം. ഹൈക്കോടതിയില് വിജിലന്സ് കാര്യങ്ങള് നോക്കുന്നതിന് ലെയ്സണ് ഓഫീസറെ നിയമിക്കും.
പൊലീസ്സ് വകുപ്പിലെ ഉദ്യോഗസ്ഥരെ വിജിലന്സില് നിയമിക്കുന്നതിന് മുമ്പ് പുതിയ മാനദണ്ഡങ്ങൾ നടപ്പിലാക്കാനും യോഗത്തിൽ തീരുമാനമായി. ഇതിനായി പരീക്ഷ നടത്തി യോഗ്യരായവരുടെ ലിസ്റ്റ് തയ്യാറാക്കും. അവര്ക്ക് വിജിലന്സ് ജോലി സംബന്ധിച്ച് പരിശീലനം നല്കും. ഇത്തരം ഉദ്യോഗസ്ഥരുടെ ഡാറ്റാ ബേസ് തയ്യാറാക്കിയ ശേഷം അതില് നിന്ന് വിജിലന്സില് നിയമിക്കും. നിയമിക്കപ്പെടുന്ന ഉദ്യോഗസ്ഥരെ കുറഞ്ഞത് മൂന്ന് വര്ഷമെങ്കിലും തുടരാന് അനുവദിക്കുന്നതായിരിക്കും.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |