നവകേരള സ്ത്രീ സദസി​ന് നെടുമ്പാശേരി​ ഒരുങ്ങുന്നു

കൊച്ചി: നവകേരള യാത്രയുടെ തുടർച്ചയായ മുഖ്യമന്ത്രി പിണറായി വിജയൻ പങ്കെടുക്കുന്ന നവകേരള സ്ത്രീ സദസി​ന് വി​പുലമായ ഒരുക്കങ്ങൾ തുടങ്ങി​. ഫെബ്രുവരി​ 22 ന് സിയാൽ കൺവെൻഷൻ സെന്ററിൽ നടക്കുന്ന പരി​പാടി​യുടെ സംഘാടക സമി​തി​ രൂപീകരി​ച്ചു.

വനിതകളുടെ മുന്നേറ്റത്തിന് ഗുണകരമാകുന്ന പരിപാടിയാകും ഇതെന്നും നവകേരള സൃഷ്ടിയിലൂടെ സ്ത്രീപക്ഷ കേരളം കെട്ടിപ്പടുക്കുകയാണ് സദസിലൂടെ ലക്ഷ്യമിടുന്നതെന്നും യോഗത്തി​ൽ ഓൺ​ലൈനായി​ പങ്കെടുത്ത ആരോഗ്യമന്ത്രി വീണാ ജോർജ് പറഞ്ഞു.

സ്ത്രീസൗഹൃദ കേരളം എന്ന ലക്ഷ്യം യാഥാർത്ഥ്യമാക്കുന്നതിനായി പുതിയ നിർദ്ദേശങ്ങൾ സ്വരൂപിക്കുന്നതിനും ചർച്ച ചെയ്യുന്നതിനുമായാണ് നവകേരള സ്ത്രീസദസ് സംഘടിപ്പിക്കുന്നത്. നവകേരളം സ്ത്രീപക്ഷ കേരളമായിരിക്കണമെന്നതാണ് സർക്കാരിന്റെ കാഴ്ചപ്പാട്. ഇതിന് അനുകൂലമായ നിർദ്ദേശങ്ങളും അഭിപ്രായങ്ങളും നവകേരള സദസിൽ ലഭിച്ചി​ട്ടുണ്ടെന്നും മന്ത്രി പറഞ്ഞു.

വ്യവസായ മന്ത്രി പി.രാജീവ് മുഖ്യ രക്ഷാധികാരിയും മന്ത്രി വീണാ ജോർജ് ചെയർപേഴ്‌സണുമായ സംഘാടക സമി​തി​ക്കാണ് രൂപം നൽകി​യത്. സാമൂഹ്യനീതി മന്ത്രി ആർ. ബിന്ദു, ക്ഷീരവികസനമന്ത്രി ജെ. ചിഞ്ചുറാണി, മേയർ എം. അനിൽകുമാർ എന്നിവർ രക്ഷാധികാരികളാണ്. തദ്ദേശസ്വയംഭരണ പ്രിൻസിപ്പൽ സെക്രട്ടറി ശർമിള മേരി ജോസഫാണ് ജനറൽ കൺ​വീനർ. ഡോ.ടി​.എൻ.സീമ

വർക്കിംഗ് ചെയർപേഴ്‌സണും ഡോ. പി എസ് ശ്രീകല സെക്രട്ടറി​യുമാണ്.

എറണാകുളം ഗസ്റ്റ് ഹൗസിൽ ചേർന്ന യോഗത്തിൽ മേയർ എം.അനിൽകുമാർ അദ്ധ്യക്ഷത വഹിച്ചു. വനിതാ കമ്മി​ഷൻ അദ്ധ്യക്ഷ പി.സതീദേവി, ഡെപ്യൂട്ടി മേയർ കെ.എ ആൻസിയ, ആരോഗ്യ പ്രിൻസിപ്പൽ സെക്രട്ടറി മുഹമ്മദ് ഹനീഷ്, ജില്ലാ കളക്ടർ എൻ.എസ്.കെ ഉമേഷ് തുടങ്ങിയവർ പങ്കെടുത്തു.