ആംബുലൻസിൽ കഞ്ചാവ് കടത്ത്: രണ്ട് പേർ പിടിയിൽ

കൊല്ലം: പത്തനാപുരത്ത് ആംബുലൻസിൽ കടത്താൻ ശ്രമിച്ച നാല് കിലോ കഞ്ചാവുമായി രണ്ട് പേർ പൊലീസ് പിടിയിൽ. കറവൂർ സ്വദേശി വിഷ്ണു, പുനലൂർ സ്വദേശി നസീർ എന്നിവരാണ് പത്തനാപുരം പൊലീസിന്റെ പിടിയിലായത്‌.കഴിഞ്ഞ ദിവസം രാത്രി 7.30 ന് പത്തനാപുരം പിടവൂര്‍ ജംഗ്ഷന് സമീപം വെച്ചാണ് ഇരുവരും പിടിയിലാകുന്നത്.പുനലൂരിലേക്ക് കഞ്ചാവ് കടത്തുന്നതിനിടെയാണ് സംഘം പിടിയിലായത്. പുനലൂർ താലൂക്ക് ആശുപത്രിക്ക് സമീപം സ‌ർവീസ് നടത്തുന്ന ആംബുലൻസിലാണ് കഞ്ചാവ് കടത്തിയത്.കഴിഞ്ഞ ഒരാഴ്ചയായി ഇരുവരും പൊലീസിന്റെ നിരീക്ഷണത്തിലായിരുന്നു. ആംബുലൻസിനെ പിന്തുടർന്നാണ് അന്വേഷണസംഘം കഞ്ചാവ് സംഘത്തെ പിടികൂടിയത്.

കൊട്ടാരക്കര റൂറൽ എസ്.പിക്ക് കീഴിലുള്ള ഡാൻസാഫ് സംഘവും പത്തനാപുരം പൊലീസും ചേർന്നാണ് അംബുലൻസ് ഉൾപ്പെടെ പ്രതികളെ പിടികൂടിയത്.