സ്വപ്നഭൂമിയാകാൻ പാതിരാമണൽ

മുഹമ്മ : സഞ്ചാരികളുടെ മനം കവരാൻ കൂടുതൽ പദ്ധതി​കളുമായി​ പാതിരാമണൽ ഒരുങ്ങുന്നു. കൂടുതൽ ബോട്ട് സർവീസുകളും വി​നോദ സഞ്ചാര പദ്ധതി​കളും ആവി​ഷ്കരി​ച്ച് വേമ്പനാട്ടു കായലി​ലെ ഈ ദ്വീപി​നെ സ്വപ്നഭൂമി​യാക്കാനുള്ള ഒരുക്കത്തി​ലാണ് മുഹമ്മ ഗ്രാമപഞ്ചായത്തും മന്ത്രി​ പി​.പ്രസാദ് ഉൾപ്പെടെയുള്ള ജനപ്രതി​നി​ധി​കളും. ദ്വീപിന്റെ ജൈവ വൈവിദധ്യം സംരക്ഷിച്ചു കൊണ്ട് ടൂറിസ്റ്റുകളെ മാടി വിളിക്കുകയാണ് ലക്ഷ്യം.

വൈദ്യുതി​ ഇല്ലാത്തതി​ന് പരി​ഹാരമായി​ ദ്വീപിൽ സ്ഥാപിച്ച സൗരോർജ്ജ പാനലിന്റെ ഉദ്ഘാടനം കഴി​ഞ്ഞ ദി​വസം മന്ത്രി​ പ്രസാദ് നി​ർവഹി​ച്ചു. വൈദ്യുതി ഇല്ലാത്തതു കാരണം രാത്രികാലങ്ങളിൽ ഇവിടെ സാമൂഹ്യവിരുദ്ധ ശല്യം വ്യാപകമായിരുന്നു.

സഞ്ചാരി​കളെ ആകർഷി​ക്കുന്നതി​നായി​ കഴി​ഞ്ഞ വർഷം പഞ്ചായത്തിന്റെ നേതൃത്വത്തിൽ നടത്തി​യ പാതി​രാമണൽ ഫെസ്റ്റും വി​ജയമായി​രുന്നു. ഫെസ്റ്റിന് ശേഷം ടൂറിസ്റ്റുകളുടെ എണ്ണത്തിൽ വൻ വർദ്ധനവ് ഉണ്ടായതായി​ മുഹമ്മ ഗ്രാമ പഞ്ചായത്ത് പ്രസിഡന്റ് സ്വപ്ന ഷാബു പറഞ്ഞു. സഞ്ചാരി​കൾക്കായുള്ള പ്രവേശനഫീസി​ൽ നി​ന്നാണ് പഞ്ചായത്തി​ന് വരുമാനം. ഇപ്പോൾ നടപ്പാക്കുന്ന പദ്ധതികളുടെ ഉദ്ഘാടനം കൂടി കഴിയുന്നതോടെ ദീപിൽ നിന്നുള്ള വരുമാനം ഗണ്യമായി ഉയരുമെന്നാണ് പ്രതീക്ഷ .

സഞ്ചാരികൾ വർദ്ധിച്ചു

 അപൂർവ ഇനം പക്ഷികളുടെ ആവാസ കേന്ദ്രം കൂടിയാണ് പാതിരാമൽ

 ബോട്ടുജെട്ടികളുടെ നവീകരണമുൾപ്പെടെ ഇവിടെ നടപ്പാക്കേണ്ടതുണ്ട്

 ജലഗതാഗത വകുപ്പിന്റെ ബോട്ടുകളിൽ സഞ്ചാരികൾ കൂടുതലായി എത്തുന്നുണ്ട്

 ഹൗസ് ബോട്ടുകളും കൂടുതലായി പാതിരാമണലിലേക്ക് സഞ്ചാരികളുമായെത്തുന്നു

ഇപ്പോൾ പ്രതിദിന വരുമാനം: 20 ,000രൂപ

പാതിരാമണൽ ഫെസ്റ്റിന് മുമ്പുള്ള വരുമാനം : 1000 രൂപ

ദ്വീപിൽ നടപ്പാക്കുന്ന പദ്ധതികൾ തടസപ്പെടുത്തുന്ന നടപടികൾ ദൗർഭാഗ്യകരമാണ്. ദ്വീപിന്റെ വികസനം ഏതുവിധേനയും തടയുകയാണ് ഇവരുടെ ലക്ഷ്യം. ഇതെല്ലാം മുന്നിൽ കണ്ട് കൊണ്ടാകും ഇനി നടപ്പാക്കുന്ന വികസന പദ്ധതിയ്ക്ക് അംഗീകാരം വാങ്ങുക

- മന്ത്രി പി​.പ്രസാദ്