എം.ഡി.എം.എ വിൽപ്പന: യുവതിയുൾപ്പടെ മൂന്ന് പേർ പിടിയിൽ

കൊല്ലം: എം.ഡി.എം.എ വിൽപ്പനയുമായി ബന്ധപ്പെട്ട് യുവതി അടക്കം മൂന്ന് പേർ പിടിയിൽ. മുണ്ടയ്ക്കൽ, ഉദയമാർത്താണ്ഡപുരം, പുതുവൽ പുരയിടം, ബീച്ച് നഗർ-83ൽ രാജീവൻ(23), മുണ്ടയ്ക്കൽ, ഉദയമാർത്താണ്ഡപുരം, പുതുവൽ പുരയിടം, തിരുവാതിര നഗർ-16ൽ, അരുൺ(28),ആദിനാട്, കാട്ടിൽകടവ്, വിഷ്ണു ഭവനിൽ അശ്വതി (28) എന്നിവരാണ് ശക്തികുളങ്ങര പൊലീസിന്റെ പിടിയിലായത്.

ശക്തികുളങ്ങര പൊലീസിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ പൊലീസും ഡാൻസാഫ് ടീമും സംയുക്തമായി നീണ്ടകര പാലത്തിന് സമീപം നടത്തിയ വാഹന പരിശോധനയിലാണ് രാജീവനും അരുണും സഞ്ചരിച്ച ബൈക്കിൽ നിന്ന് 30ഗ്രാം എം.ഡി.എം.എ കണ്ടെത്തിയത്. ഇവർക്ക് എം.ഡി.എം.എ വിതരണം ചെയ്തതിനാണ് അശ്വതിയെ അറസ്റ്റ് ചെയ്തത്. ഇവരുടെ ഭർത്താവ് വിഷ്ണുവിനെ 740ഗ്രാം എം.ഡി.എംഎയുമായി കരുനാഗപ്പള്ളി പൊലീസ് കഴിഞ്ഞ ദിവസം പിടികൂടിയിരുന്നു. ശക്തികുളങ്ങര പൊലീസ് ഇൻസ്‌പെക്ടർ ഉദയകുമാർ, സബ് ഇൻസ്‌പെക്ടർമാരായ വിനോദ്, പ്രദീപ്, സജയൻ എന്നിവരടങ്ങിയ പൊലീസ് സംഘവും ഡാൻസാഫ് ടീമും ചേർന്നാണ് പ്രതികളെ പിടികൂടിയത്.