യുവാവിനെ വധിക്കാൻ ശ്രമിച്ച കേസിൽ രണ്ട് പ്രതികൾകൂടി അറസ്റ്റിൽ

അങ്കമാലി: യുവാവിനെ കുത്തിക്കൊലപ്പെടുത്താൻ ശ്രമിച്ച കേസിൽ രണ്ടുപേർകൂടി അറസ്റ്റിൽ. തിരുപ്പൂരിൽ ഒളിവിൽ കഴിയുകയായിരുന്ന കറുകുറ്റി പടയാട്ടിവീട്ടിൽ സിജോ (ഊത്തപ്പൻ സിജോ 38), കറുകുറ്റി ബസ്ലഹേം പാറക്കടവീട്ടിൽ ആഷിക് ( 22) എന്നിവരെയാണ് അങ്കമാലി പൊലീസ് അറസ്റ്റുചെയ്തത്. നാലുപേരെ നേരത്തെ അറസ്റ്റുചെയ്തിരുന്നു. കറുകുറ്റിയിലെ ബാറിൽ കഴിഞ്ഞ മാസം 28 ന് രാത്രിയാണ് സംഭവം. അങ്കമാലി സ്വദേശി ഡോണിനാണ് കുത്തേറ്റത്. രണ്ട് സംഘങ്ങൾ തമ്മിൽ വാക്കേറ്റമുണ്ടാവുകയും അത് സംഘട്ടനത്തിൽ കലാശിക്കുകയുമായിരുന്നു. ഡോണിനെ സോഡാക്കുപ്പി പൊട്ടിച്ചെടുത്തു കുത്തുകയും കൂടെയുണ്ടായിരുന്ന രണ്ട് പേരെ സോഡാ കുപ്പി കൊണ്ട് അടിക്കുകയും ചെയ്തു. പ്രതികൾ സിജോയുടെ തിരുപ്പൂരും കർണാടകയിലുമുള്ള സുഹൃത്തുക്കളുടെ വീട്ടിൽ ഒളിവിലായിരുന്നു. നിരവധി കേസുകളിലെ പ്രതിയാണ് സിജോ. 2024 ഫെബ്രുവരിയിൽ വെള്ളിക്കുളങ്ങരയിൽ യുവാവിനെ ആക്രമിച്ച് മൃതപ്രായനാക്കിയ കേസിൽ ഒളിവിലായിരുന്നു.

ഡിവൈ.എസ്.പി ടി.ആർ രാജേഷ്, ഇൻസ്പെക്ടർ അരുൺകുമാർ, എസ്.ഐമാരായ പ്രദീപ്കുമാർ, കെ.പി വിജു, എം.എസ് ബിജേഷ്, എ. എസ്.ഐ ഫ്രാൻസിസ് എം.പി, സീനിയർ സി.പി.ഒമാരായ അജിതാ തിലകൻ, എം.ആർ. മിഥുൻ, അജിത്കുമാർ, നവീൻദാസ്, സിമിൽ റാം, പി.കെ. ഷിഹാബ്എന്നിവരാണ് അന്വേഷണ സംഘത്തിലുള്ളത്.