ഹെൽമെറ്റുകൊണ്ട്തലയ്ക്കടിച്ചയുവാവ് അറസ്റ്റിൽ

ആലപ്പുഴ: മാനസികമായി വെല്ലുവിളി നേരിടുന്നയാളെ നടുറോഡിൽ ഹെൽമെറ്റുകൊണ്ട് തലയ്ക്കടിച്ച് പരിക്കേൽപ്പിച്ച യുവാവ് അറസ്റ്റിൽ. തൃക്കുന്നപ്പുഴ പതിയങ്കര ചിറയിൽ വീട്ടിൽ ഹനീസ് (24)ആണ് ആലപ്പുഴ സൗത്ത് പൊലീസിന്റെ പിടിയിലായത്. ശനിയാഴ്ച രാത്രി 7.40ന് സക്കറിയ ബസാർ വട്ടപ്പള്ളിറോഡിലാണ് സംഭവം. വട്ടപ്പള്ളി സ്വദേശിയായ ബഷീറിനാണ് (50) മർദ്ദനമേറ്റത്. പ്രതിയുടെ ഭാര്യ ഓടിച്ച സ്കൂട്ടർ ബഷീറിന്റെ പിന്നിൽ ചെന്ന് ഹോൺ അടിച്ചതിനെ തുടർന്ന് വാക്കു തർക്കമുണ്ടായി. തുടർന്ന്,​ സ്കൂട്ടറിന് പിന്നിലിരിക്കുകയായിരുന്ന പ്രതി ഹെൽമറ്റ് ഊരി ബഷീറിനെ മർദ്ദിക്കുകയായിരുന്നു. പരിക്കേറ്റ ബഷീർ ജനറൽ ആശുപത്രിയിൽ ചികിത്സതേടി. സൗത്ത് ഇൻസ്പെക്ടർ കെ.ശ്രീജിത്ത്, എസ്.ഐ സാലിമോൻ, എസ്.ഐ വിജു,സീനിയർ സി.പി.ഒമാരായ ജോർജ്ജ്, അജിത്ത് എന്നിവരുടെ നേതൃത്വത്തിലാണ് പ്രതിയെ പിടികൂടിയത്. പ്രതിയെ റിമാൻഡ് ചെയ്തു.