പ്രത്യക്ഷ നികുതി സമാഹരണത്തിൽ ഇടിവ്

കൊച്ചി: നടപ്പു സാമ്പത്തിക വർഷത്തിലെ ആദ്യ നൂറ് ദിവസങ്ങളിൽ രാജ്യത്തെ അറ്റ പ്രത്യക്ഷ നികുതി വരുമാനം 1.3 ശതമാനം ഇടിഞ്ഞ് 5.6 ലക്ഷം കോടി രൂപയായി. കോർപ്പറേറ്റ്, വ്യക്തിഗത വരുമാന നികുതികൾ ഇക്കാലയളവിൽ 3.2 ശതമാനം ഉയർന്ന് 6.6 ലക്ഷം കോടി രൂപയിലെത്തി. അതേസമയം നികുതി റീഫണ്ടുകളായി 1.01 ലക്ഷം കോടി രൂപയാണ് നൽകിയത്. മുൻവർഷത്തേക്കാൾ 38 ശതമാനം അധികം തുകയാണിത്. 2013-14 സാമ്പത്തിക വർഷത്തേക്കാൾ വരുമാന നികുതി റീഫണ്ടിൽ 474 ശതമാനം വർദ്ധനയുണ്ടെന്ന് കേന്ദ്ര സർക്കാർ വ്യക്തമാക്കി.

റിട്ടേൺ നൽകുന്നവരുടെ എണ്ണത്തിൽ കുതിപ്പ്

കഴിഞ്ഞ സാമ്പത്തിക വർഷം 4.77 ലക്ഷം കോടി രൂപയാണ് റീഫണ്ടായി നൽകിയത്. ഇക്കാലയളവിൽ മൊത്തം നികുതി സമാഹരണത്തിൽ 274 ശതമാനം വർദ്ധനയാണുണ്ടായത്. പത്ത് വർഷത്തിനിടെ ടാക്സ് റിട്ടേൺ നൽകുന്നവരുടെ എണ്ണം 133 ശതമാനം ഉയർന്ന് 8.89 കോടിയായി.