പുനലൂർ റെയിൽവേ സ്റ്റേഷനിൽ എൻജിന് തീ പിടിച്ചു

പുനലൂർ:പുനലൂർ റെയിൽവേ സ്റ്റേഷനിൽ വച്ച് ട്രെയിനിന്റെ എൻജിനിൽ നേരിയ തീപിടിത്തം. ഗുരുവായൂർ- മധുര എക്സ്‌പ്രസ് ട്രെയിനിൽ ഘടിപ്പിക്കാനായി സജ്ജമാക്കിയ ബാങ്കർ എൻജിനിലാണ് തീപിടിത്തം ഉണ്ടായത്. ജീവനക്കാർ ഉടൻ തീ അണച്ചതിനാൽ വൻ ദുരന്തം ഒഴിവായി.ഇന്നലെ ഉച്ചയ്ക്ക് 1.10ന് ഒന്നാമത്തെ പ്ളാറ്റ് ഫോമിലായിരുന്നു അപകടം. മുന്നിൽ മാത്രം എൻജിനുമായാണ് ഗുരുവായൂർ-മധുര എക്സ്‌പ്രസ് കൊല്ലത്ത് നിന്ന് പുനലൂരിൽ എത്തുന്നത്. ചെങ്കോട്ട ഭാഗത്തെ വൻ കയറ്റങ്ങൾ കയറാൻ പിന്നിൽ ഡീസൽ ബാങ്കർ എൻജിൻ കൂടി ഘടിപ്പിച്ചാണ് മധുരയിലേക്ക് പോകുന്നത്. ഇത്തരത്തിൽ ഘടിപ്പിക്കാനായി കൊണ്ടുവന്ന ബാങ്കർ എൻജിനിലാണ് തീപിടിത്തം ഉണ്ടായത്.