ബ്രെയിൻ ഡ്രെയിനും ഉന്നത വിദ്യാഭ്യാസവും

ലോകവത്കരണത്തിന്റെ വേഗതയേറിയ കാലഘട്ടത്തിൽ “ബ്രെയിൻ ഡ്രെയിൻ” എന്ന ആശയം വീണ്ടും ചർച്ചകളുടെ കേന്ദ്രസ്ഥാനത്ത് എത്തുകയാണ്. മികച്ച വിദ്യാഭ്യാസവും തൊഴിൽ അവസരങ്ങളും തേടി യുവപ്രതിഭകൾ വിദേശത്തേക്ക് ഒഴുകുന്ന പ്രവണത പുതുമയുള്ളതല്ലെങ്കിലും, അതിന്റെ സ്വഭാവത്തിലും ദിശയിലും സംഭവിക്കുന്ന മാറ്റങ്ങൾ ഇന്ന് കൂടുതൽ ശ്രദ്ധേയമാണ്. ഈ പശ്ചാത്തലത്തിലാണ് പുതിയ അക്കാഡമിക് വർഷത്തെ വരവേൽക്കാൻ ഒരുങ്ങുന്ന ഇന്ത്യയുടെ ഉന്നത വിദ്യാഭ്യാസ മേഖലയെ കുറിച്ച് ഗൗരവമായ വിലയിരുത്തൽ അനിവാര്യമാകുന്നത്.

പ്രതീക്ഷകളും സാദ്ധ്യതകളും കൈമുതലാക്കി മുന്നേറുന്ന ഈ മേഖലയിൽ, വിദ്യാഭ്യാസത്തെ കൂടുതൽ കാര്യക്ഷമവും കാലാനുസൃതവുമാക്കേണ്ട ആവശ്യകത ശക്തമായി ഉയർന്നു വരുന്നു. ലോകമെമ്പാടും അംഗീകരിക്കപ്പെട്ട ഭാരതീയ വിദ്യാഭ്യാസ പാരമ്പര്യം ഇന്നും മാതൃകാപരമായി നിലകൊള്ളുന്നുണ്ടെങ്കിലും, ആഗോള പ്രവണതകൾ വേഗത്തിൽ മാറുന്ന സാഹചര്യത്തിൽ പുതിയ ചിന്തകളും നവീന ദിശകളും സ്വീകരിക്കാതെ മുന്നേറാൻ കഴിയില്ല.

ഇന്നത്തെ ആഗോള വിദ്യാഭ്യാസ രംഗത്ത് ശ്രദ്ധേയമായ മാറ്റമാണ് സംഭവിച്ചു കൊണ്ടിരിക്കുന്നത്. അമേരിക്കൻ വിദ്യാർത്ഥികൾ ക്രമേണ സ്റ്റെം (STEM- സയൻസ്,ടെക്‌നോളജി,എൻജിനിയറിംഗ്,മാത്തമാറ്റിക്സ്) വിഷയങ്ങളിൽ നിന്ന് പിന്തിരിയുമ്പോൾ, ഇന്ത്യൻ, ചൈനീസ് വിദ്യാർത്ഥികൾ ഈ മേഖലകളിലേക്ക് ശക്തമായി കടന്നുവരുന്നു. ഉയർന്ന പഠനച്ചെലവും കഠിനമായ പ്രവേശന മാനദണ്ഡങ്ങളും അമേരിക്കൻ വിദ്യാർത്ഥികളെ പിന്തിരിപ്പിക്കുമ്പോൾ, ഈ അവസരം വിദേശ വിദ്യാർത്ഥികൾ പ്രയോജനപ്പെടുത്തുന്നു.

കൃത്രിമ ബുദ്ധി, ഡാറ്റ സയൻസ്, എൻജിനിയറിംഗ് മേഖലകളിൽ ഇന്ത്യൻ വിദ്യാർത്ഥികളുടെ പങ്ക് ഏറെ ശ്രദ്ധേയമാണ്. അതേസമയം,​ ഓരോ വർഷവും ഏകദേശം 2.5 മില്യൺ സ്റ്റെം ബിരുദധാരികൾ ഇന്ത്യയിലെ തൊഴിൽ മേഖലയിലേക്ക് എത്തുന്നതായി കണക്കുകൾ സൂചിപ്പിക്കുന്നു. ഇത് ഇന്ത്യയെ ആഗോള പ്രതിഭകളുടെ പ്രധാന കേന്ദ്രമായി ഉയർത്തുന്ന ഒരു ഘടകമാണ്. ഈ സാദ്ധ്യത തിരിച്ചറിഞ്ഞ് മൾട്ടിനാഷണൽ കമ്പനികൾ അവരുടെ ഗ്ലോബൽ കേപ്പബിലിറ്റി സെന്ററുകൾ (ജി.സി.സി)ഇന്ത്യയിൽ വ്യാപകമായി സ്ഥാപിക്കുന്നു. ഇന്ന് 1800ലധികം ഇത്തരം കേന്ദ്രങ്ങൾ രാജ്യത്ത് പ്രവർത്തിക്കുന്നുവെന്നത് ഇന്ത്യയുടെ ഉയർന്നുവരുന്ന പ്രാധാന്യത്തിന്റെ തെളിവാണ്.

എന്നാൽ, ഈ വളർച്ചയ്ക്കൊപ്പം ചില ആശങ്കകളും നിലനിൽക്കുന്നു. മികവുറ്റ മനുഷ്യവിഭവശേഷി കുറച്ചുമേഖലകളിലേക്ക് മാത്രം കേന്ദ്രീകരിക്കുന്നത് മറ്റൊരു തരത്തിലുള്ള “ബ്രെയിൻ ഡ്രെയിൻ” എന്ന നിലയ്ക്കും വിലയിരുത്തപ്പെടുന്നു.

ഗുണമേന്മ,​ നവീകരണ ശേഷി
ഇന്ത്യയ്ക്ക് മുന്നിലുള്ള അവസരങ്ങൾ വലുതാണെങ്കിലും അവ പ്രയോജനപ്പെടുത്താൻ വിദ്യാഭ്യാസ രംഗത്ത് ഗുണമേന്മയും നവീകരണ ശേഷിയും ഉറപ്പാക്കണം. ഗവേഷണ നിക്ഷേപം വർദ്ധിപ്പിക്കുക, ആഗോള സർവകലാശാലകളുമായി സഹകരണം ശക്തിപ്പെടുത്തുക, പഠനരീതികളെ നവീകരിക്കുക എന്നിവയാണ് മുന്നോട്ടുള്ള വഴി.

കൃത്രിമ ബുദ്ധി ലോകത്തെ മാറ്റിമറിക്കുന്ന ഈ കാലഘട്ടത്തിൽ, ക്വാണ്ടം കമ്പ്യൂട്ടിംഗ്, ബയോടെക്നോളജി, ക്ലൈമറ്റ് ടെക് തുടങ്ങിയ ഭാവിമേഖലകളിൽ ഇന്ത്യ കൂടുതൽ ശ്രദ്ധ കേന്ദ്രീകരിക്കേണ്ടത് അനിവാര്യമാണ്.

“ബ്രെയിൻ ഡ്രെയിൻ” എന്ന ആശങ്കയിൽ നിൽക്കാതെ, പ്രതിഭകളെ രാജ്യത്തിനുള്ളിൽ നിലനിറുത്താനും അവരുടെ കഴിവുകൾ പരിപോഷിപ്പിക്കാനും നയപരമായ ഇടപെടലുകൾ അനിവാര്യമാണ്.

(ബംഗളൂരു ക്രൈസ്റ്റ് യൂണിവേഴ്‌സിറ്റി സ്‌കൂൾ ഒഫ് ബിസിനസ് ആന്റ് മാനേജ്മെന്റിലെ അസോസിയേറ്റ് പ്രൊഫസറാണ് ലേഖിക)